सेढवा । पर्साको जिराभवानी गाउँपालिका–१ स्थित ऐतिहासिक जिराभवानी मन्दिरका पुजारी आदेश गिरी र उनकी श्रीमती सुनिता देवी गिरीमाथि शनिबार दुर्व्यवहार भएको छ। स्थानीयका अनुसार मन्दिर संरक्षण समितिका सदस्य अनरुद महतो र हरिकिशोर शर्माले समितिको छवि बिगारेको आरोप लगाउँदै पुजारी दम्पतीसँग गालीगलौज तथा हातपात गरेका थिए।
स्थानीय जुगेश्वर गुरोका अनुसार बिहान करिब ९ बजे पुजारी दम्पतीलाई खाना खान नदिई मन्दिर परिसरबाट बाहिर निकालेको आरोप छ। मन्दिरमा हुने चढावाको आम्दानी समितिले लिने गरे पनि खर्च व्यवस्थापन समयमै नगर्दा पुजारीहरू समस्यामा परेको स्थानीयहरूको भनाइ छ। गुरोका अनुसार पुजारीका लागि न्यानो लुगा खरिद गर्न समिति स्तरबाट पटक–पटक आग्रह गरे पनि व्यवस्था नभएपछि एक दाताले लुगा उपलब्ध गराए, जसपछि समितिका केही सदस्य असन्तुष्ट बनेका थिए। यही विषयलाई लिएर विवाद चर्किएको बताइएको छ।
मन्दिरबाट निकालिएका पुजारी दम्पतीलाई स्थानीय महिला तथा युवाहरूले शनिबार साँझ पुनः मन्दिरमा पुर्याएका थिए। त्यसपछि जिराभवानी गाउँपालिकाका जनप्रतिनिधि, भद्रभलादमी तथा स्थानीय युवाहरूको उपस्थितिमा मन्दिर परिसरमै पञ्चायती गरिएको थियो।
पञ्चायतीमा समितिका सदस्य अनरुद महतो र हरिकिशोर शर्माको व्यवहार अनुचित भएको ठहर गर्दै दुर्व्यवहारका लागि पुजारी दम्पतीसँग सार्वजनिक रूपमा माफी माग्न लगाइएको स्थानीयहरूले बताएका छन्।
