काठमाडौं । नेपाल प्रहरी प्रधान कार्यालयले लैंगिक हिंसा विरुद्ध १६ दिने अभियानका क्रममा उत्कृष्ट कार्यसम्पादन गर्ने प्रहरी कर्मचारीलाई सम्मान गरेको छ।
जिल्ला प्रहरी कार्यालय रौतहटमा कार्यरत प्र.स.नि. रागनी कुमारी देशभरका महिला, बालबालिका तथा ज्येष्ठ नागरिक सेवा केन्द्रमा कार्यरत कर्मचारीमध्ये प्रथम स्थान हासिल गर्दै रु ४० हजार नगदसहित प्रशंसा–पत्र प्राप्त गर्न सफल भएकी छन्।
नेपाल प्रहरीको विभागीय नीति निर्देशन तथा आदेशको पूर्ण परिपालनासहित महिला, बालबालिका तथा ज्येष्ठ नागरिक सेवा केन्द्रको जिम्मेवारी अत्यन्त व्यावसायिक ढङ्गले वहन गर्दै लैंगिक हिंसा न्यूनीकरण तथा लैंगिक उत्तरदायी प्रहरी सेवा प्रवाहमा देखाएको उत्कृष्ट योगदान र प्रेरणादायी भूमिकाको उच्च मूल्यांकन गर्दै उनलाई यो सम्मान प्रदान गरिएको हो।
प्रशंसा–पत्र प्रहरी अतिरिक्त महानिरीक्षक सुशील सिंह राठौरल र प्रहरी महानिरीक्षक दान बहादुर कार्कीले हस्ताक्षर गरी प्रदान गरिएको हो।
सोही अवसरमा प्रहरी महानिरीक्षक दान बहादुर कार्कीले रागनी कुमारीलाई बधाई तथा आगामी कार्यप्रगतिका लागि शुभकामना व्यक्त गरेका छन्।
