सेढवा । पर्साको जिराभवानी गाउँपालिका–२ काठमान्डौटोल निवासी जंगाली मिर्दाहाले एक अतिबिपन्न परिवारलाई न्यानो लुगा, खाद्यान्न तथा शैक्षिक सामग्री सहयोग गरेका छन्।
मिर्दाहाले जगरनाथपुर गाउँपालिका–३ बड्गोटोल निवासी ग्यास मियाँको घरमै पुगेर उनका परिवारका लागि एक बोरा चामल, आलु, खानेतेल, नून, दाल, सोयाबीन, साबुन, सर्फ, कापी, पेन, ब्लाङ्केट, स्वीटरलगायत सामग्री हस्तान्तरण गरेका हुन्। आर्थिक अवस्था अत्यन्त कमजोर रहेको मियाँकी श्रीमती रबिना खातुन र तीनजना बालबालिकाका लागि यो सहयोग महत्वपूर्ण भएको छ।
खातुनका बालबालिकाले अध्ययन गर्ने गाउँको प्राथमिक विद्यालयका प्रधानाध्यापक ओमप्रकाश चौधरीले फेसबुकमार्फत न्यानो लुगा सहयोगका लागि आग्रह गरेका थिए। उक्त आग्रह सामाजिक सञ्जालमा देखेपछि हाल साउदी अरबमा रोजगारीमा रहेका मिर्दाहाका छोरा बिकाश चौधरीले आर्थिक सहयोग गरेका हुन्।
बिकाश चौधरी यसअघि पनि विभिन्न अतिबिपन्न परिवारलाई सहयोग गर्दै आएका छन् ।
