वीरगंज । भारतको महावाणिज्य दूतावास, वीरगंजद्वारा आयोजित गीता महोत्सव दूतावास परिसरमै भव्य र उत्साहपूर्ण वातावरणमा सम्पन्न भएको छ। सांस्कृतिक विविधता, आध्यात्मिकता र भारत–नेपालबीचको मैत्री सम्बन्ध सुदृढ गर्ने उद्देश्यसहित आयोजित कार्यक्रममा उल्लेख्य उपस्थितिद्वारा माहोल झनै जीवन्त बनेको पाइयो।
भारतका महावाणिज्य दूत देवी सहाय मीनाकाे अध्यक्षतामा कार्यक्रम सम्पन्न भएकाे हाे । साे अवसरमा वाेल्दै उनले गीता महोत्सव केवल धार्मिक कार्यक्रम नभई मानव जीवनका मूलभूत मूल्य—कर्तव्य, सत्य, नैतिकता र आचरणबारे मार्गदर्शन दिने आध्यात्मिक उत्सव भएको बताए । महाभारतकालीन अर्जुन–कृष्ण संवादका रूपमा प्रस्तुत गीता आजको व्यस्त र तनावपूर्ण जीवनमा पनि उस्तै सान्दर्भिक र प्रेरणादायी रहेको उनले उल्लेख गरे।
मीनाका अनुसार भगवद्गीताले मानव जीवनका तीन आयाम—कर्म, ज्ञान र भक्ति—लाई समत्व, अनुशासन र सदाचारसहित अगाडि बढाउन स्पष्ट मार्गदर्शन प्रदान गर्छ । विशेषगरी ‘निष्काम कर्म’ अर्थात् स्वार्थरहित कर्तव्यपालनले व्यक्तिलाई न केवल व्यक्तिगत जीवनमा इमानदार बन्न प्रेरित गर्छ, समाज तथा राष्ट्रप्रति उत्तरदायी बनाउने शक्ति पनि दिन्छ।
आजको भौतिकतावादी दौडधुप, मानसिक तनाव र मूल्यहरूको क्षीणताबीच गीता मनलाई स्थिर, व्यवहारलाई संयमित र सोचलाई सकारात्मक बनाउने प्रभावकारी ग्रन्थ बनेको वक्ताहरूले उल्लेख गरे।
कार्यक्रमका प्रमुख वक्ताहरूले गीता विश्व शान्ति, सद्भाव र मानवताको साझा सन्देश बोकेको अद्वितीय ग्रन्थ भएको र यसले भारत–नेपालबीचको सांस्कृतिक तथा ऐतिहासिक सम्बन्धलाई अझ मजबुत बनाउने भूमिका खेल्ने विश्वास व्यक्त गरे।
दूतावासका कन्सुल मनीष दासले कार्यक्रमको सञ्चालन तथा सहजीकरण गरेका थिए । भारतिय वाणिज्य दूत मनीष दासले कार्यक्रम समन्वयमा विशेष भूमिका निर्वाह गरेको दूतावासले जनाएको छ।
