कलैया । बारा पचरौता नगरपालिका–६, चिकनी टोल क्षेत्रमा प्रहरी र तस्कर समूहबीच गोली चलेको घटनापछि प्रहरीले चारवटा मोटरसाइकल, दुई मोबाइल र अन्य तस्करीसम्बन्धी सामग्री बरामद गरेको छ ।
आइतबार राति इलाका प्रहरी कार्यालय सिम्रौनगढबाट गस्तीमा खटिएको टोलीसँग करिब २५ जनाको तस्कर समूहको एक्कासी जम्का भेट भएपछि तस्करहरूले कटुवा बन्दुकबाट दुई राउण्ड गोली फायर गरेका थिए । प्रहरीले आत्मरक्षाका लागि ९ एमएम पेस्तोलबाट सात राउण्ड जवाफी फायर गरेको जिल्ला प्रहरी कार्यालय बाराले जनाएको छ।
गोली चलेपछि तस्कर समूह भारततर्फ फरार भए पनि उनीहरूले प्रयोग गरेका बिआर०५बिएल४१५नम्बरको बजाज पल्सर, बिआर०५बि६८६४ नम्बरको स्प्लेंडर, बिआर०५बिडि९८२१नम्बरको बजाज पल्सर र बिआर०५एडब्लु०५०१ नम्बरको हिरो स्प्लेंडर मोटरसाइकलहरू घटना स्थल नजिकै छोडेर भागेको प्रहरीले बताएको छ।
साथै भारतीय सिम प्रयोग भएको ओप्पो मोबाइल, एयरटेल र एनसेल सिमसहितको सामसुङ मोबाइल, र भारतीय नागरिक रञ्जित कुमारको सवारी चालक अनुमति पत्र समेत बरामद गरिएको छ। घटनास्थलमा थप प्रहरी टोली परिचालन गरी आवश्यक अनुसन्धान जारी रहेको प्रहरीले जानकारी दिएको छ।
