वीरगंज । वीरगंजस्थित नारायणी अस्पतालमा भएको चरम अनियमितता, आर्थिक दुरुपयोग र व्यवस्थापकीय कमजोरीका विषयमा निष्पक्ष छानबिनको माग गर्दै जेन-जी पर्साले आइतबार जिल्ला प्रशासन कार्यालय, पर्सामा ध्यानाकर्षणपत्र तथा ज्ञापनपत्र बुझाएको छ ।
पछिल्लो समय अस्पतालभित्र औषधि खरिद, उपकरण प्रयोग र प्रशासनिक क्षेत्रमा देखिएका आर्थिक अनियमितता सम्बन्धी गुनासोहरू बढेपछि जेन जी पर्साको टोलीले प्रमुख जिल्ला अधिकारी भोला दाहाल समक्ष औपचारिक रूपमा ज्ञापनपत्र बुझाएको हो ।
ज्ञापनपत्रमा अस्पतालको आर्थिक वर्ष २०८१/८२ को सम्पूर्ण आय–व्यय विवरण सार्वजनिक गर्न, खरिद गरिएका तर प्रयोगमा नआएका उपकरणहरूको अवस्थाबारे छानबिन गर्न, र जिम्मेवार पदाधिकारीहरूलाई कारबाहीको दायरामा ल्याउन माग गरिएको छ ।
ज्ञापनपत्र बुझाउँदै जेन जी पर्साका प्रतिनिधि विशेष साहले भने, “नारायणी अस्पताल वीरगंजको मुख्य स्वास्थ्य संस्था हो । यहाँ हुने अनियमितताले प्रत्यक्ष रूपमा गरिब र विपन्न वर्गका नागरिकको स्वास्थ्य सेवामा असर पारेको छ । तत्काल छानबिन समिति गठन गरी दोषीमाथि कारबाही हुनुपर्छ ।”
अस्पतालमा व्याप्त बेथिति र सेवाको गुणस्तर कमजोर भएको विषयमा केही संचारमाध्यमा समाचार प्रकाशनमा आएपछि जेनजिहरुकाे त्यस तर्फ ध्यान पुगेकाे हाे । जनस्वास्थ्यसँग प्रत्यक्ष सरोकार राख्ने विषयमा प्रशासनले शीघ्र ध्यान दिनुपर्ने उनीहरुले माग गरेका छन् ।
जेन-जिले बुझाएकाे ज्ञापन पत्र अख्तियार दुरुपयोग अनुसन्धान आयोग, टंगाल, काठमाडौं र स्वस्थय तथा जनसंख्या मन्त्रालय सिंहदरबार काठमाडौंलाई समेत बाेद्धार्थ गरेकाे छ ।
