वीरगंज । चालु आर्थिक वर्षको पहिलो तीन महिनामा वीरगञ्ज भन्सार नाकाबाट करिब रु ३८ अर्ब नौ करोड मूल्य बराबरका पेट्रोलियम पदार्थ आयात भएका छन्। डिजेल, पेट्रोल, एलपी ग्यास (लिक्विफाइड पेट्रोलियम ग्यास), एभिएसन टर्बाइन फ्युल (एटिएफ) र मट्टितेलसमेत गरी पाँच थरिका पेट्रोलियम पदार्थ आयातबाट कुल रु १६ अर्ब १२ करोड राजस्व सङ्कलन भएको वीरगञ्ज भन्सार कार्यालयले जनाएको छ।
गत आर्थिक वर्षको सोही अवधिमा रु ३९ अर्ब १५ करोड मूल्यका पेट्रोलियम पदार्थ आयात भएका थिए भने रु १६ अर्ब सात करोड राजस्व संकलन भएको थियो। यसरी चालु आवको सो अवधिमा रकमको आधारमा पेट्रोलियम पदार्थ आयातमा करिब रु एक अर्ब छ करोडले कमी आएको भन्सार कार्यालयका प्रमुख भन्सार प्रशासक विष्णुप्रसाद ज्ञवालीले जानकारी दिनुभयो।
भन्सार कार्यालयका अनुसार चालु आवको असोज मसान्तसम्म रु १५ अर्ब ७२ करोड मूल्य बराबरको एक लाख ७४ हजार ९२४ किलोलिटर डिजेल आयात भएको छ, जसबाट रु छ अर्ब ९६ करोड राजस्व सङ्कलन भएको छ। त्यस्तै, तीन महिनामा रु १० अर्ब ७२ करोड मूल्य बराबरको एक लाख २५ हजार ३८० किलोलिटर पेट्रोल आयात हुँदा रु सात अर्ब नौ करोड राजस्व प्राप्त भएको छ।
सोही अवधिमा रु सात अर्ब ४९ करोड मूल्यका सात करोड ३९ लाख ७७ हजार दुई सय ७१ किलोग्राम एलपी ग्यास आयात भएको भन्सार कार्यालयले जनाएको छ।
