वीरगंज । पर्साका युवाहरूले नेपालका युवा तथा खेलकुद मन्त्री बब्लु गुप्तासँग काठमाडौंस्थित सिंहदरबारमा भेटघाट गरी युवासम्बन्धी नीति, खेलकुद पूर्वाधार विकास तथा स्थानीय स्तरमा युवाको सहभागिता विस्तारका विषयमा विस्तृत छलफल गरेका छन्।
जेन-जि पर्सा टिमका प्रतिनिधिहरूले मन्त्री गुप्तालाई बधाई ज्ञापन गर्दै युवाको हकहित र खेलकुद क्षेत्रको दिगो विकासका लागि मागपत्र समेत बुझाएका हुन ।
मागपत्रमा युवाहरूले वीरगंजस्थित ऐतिहासिक नारायणी रंगशालाको जीर्णोद्धार र स्तरोन्नति गरी अन्तर्राष्ट्रिय स्तरको खेलकुद पूर्वाधारको रूपमा विकास गर्न जोड दिएका छन्। साथै, प्रत्येक स्थानीय पालिकामा आधुनिक खेलकुद मैदान निर्माण, योग्यताका आधारमा पारदर्शी नियुक्ति प्रक्रिया लागू गर्न, खेलकुद एकेडेमी र छात्रवृत्ति योजना सञ्चालन गर्न, तथा युवा प्रतिनिधित्व सुनिश्चित गर्दै स्थानीय युवा क्लब गठन गर्न आग्रह गरेका छन्।
भेटका क्रममा मन्त्री गुप्ताले युवाहरूका सुझाव र मागहरू ध्यानपूर्वक सुन्नुहुँदै आगामी दिनमा नारायणी रंगशाला सम्बन्धी सकारात्मक समाचार आउने संकेत गर्नुभएको छ। साथै, मन्त्रालयले खेलकुद पूर्वाधार र युवा सहभागिता विस्तारका लागि आवश्यक पहल गर्ने आश्वासन पनि दिनुभयो।
भेटमा सहभागी जेन-जि पर्सा टिमका प्रतिनिधि अनिल कुमार साह, विशेष साह, रणधिर कुमार बर्णवाल र युवराज मुखियाले यस छलफलले पर्सा सहित सम्पूर्ण देशका युवाहरूमा नयाँ उत्साह र आशाको सन्देश दिएको बताएका छन्।
