वीरगंज । जनमत पार्टी वीरगंज महानगरपालिका वडा नं. ८ वडा इकाई समितिको आयोजनामा तथा पार्टी जिल्ला सदस्य कंचन गुप्ताको सौजन्यमा शनिबार छठ पर्वको पावन अवसरमा वडा स्तरीय शुभकामना आदानप्रदान तथा सामग्री वितरण कार्यक्रम सम्पन्न भएको छ।
कार्यक्रममा ३१ जना ब्रतालु महिलाहरूलाई साडी, नारिवल र पूजाका सामग्रीहरू उपहार (कोशेली) स्वरूप वितरण गरिएको जनमत पार्टीले जनाएको छ।
कार्यक्रममा बोल्दै जनमत पार्टी पर्साका अध्यक्ष ओमप्रकाश सरार्फले छठ पर्व केवल धार्मिक आस्थाको पर्व नभई सामाजिक एकता, वैज्ञानिक सोच, सहिष्णुता र सांस्कृतिक पहिचानको प्रतीक भएको बताउनुभयो। उहाँले यस पर्वले समाजमा पारस्परिक सद्भाव, सहयोग र आस्थाको वातावरण सुदृढ गर्नुका साथै मौलिकता तथा प्रकृतिको संरक्षणमा महत्त्वपूर्ण भूमिका खेल्ने उल्लेख गर्नुभयो।
कार्यक्रममा पार्टीका केन्द्रीय सदस्य बिध्यलाल प्रसाद र श्याम गुप्ता, वडा इकाई अध्यक्ष रामजी रौनियार, युवा दस्ता जिल्ला अध्यक्ष मनोज साह, तथा नेताहरू निरञ्जन कुशवाहा र रोहित पटेल लगायतको उपस्थिति रहेको थियो।
जिल्ला सदस्य कंचन गुप्ताले ब्रतालु महिलाहरूलाई सहयोग गर्न पाउनु गर्वको विषय भएको बताउँदै जनमत पार्टी सधैं समाज, संस्कार र सेवामूलक कार्यमा अग्रणी रहेको उल्लेख गर्नुभयो। उहाँले महिला सशक्तीकरण र सांस्कृतिक संरक्षणमा निरन्तर योगदान दिने प्रतिबद्धता पनि व्यक्त गर्नुभयो।
