वीरगंज । हिन्दु स्वयंसेवक संघका संघचालक तथा नेपाल प्रहरीका पूर्व अतिरिक्त महानिरीक्षक कल्याण कुमार तिम्सिनाको सान्निध्यमा वीरगंजमा “हिन्दु राष्ट्र स्वाभिमान जागरण अभियान” अन्तर्गत बारा र पर्सा जिल्लास्तरीय प्रबुद्ध नागरिक गोष्ठीको तयारीका सम्बन्धमा विशेष छलफल तथा विमर्श कार्यक्रम सम्पन्न भएको छ ।
कार्यक्रममा स्थानीय समाजसेवी, शिक्षाविद्, धार्मिक अगुवा, युवा प्रतिनिधि तथा नागरिक समाजका प्रतिष्ठित व्यक्तित्वहरूको सहभागिता रहेको थियो । छलफलमा अभियानका उद्देश्य, हिन्दु समाजमा जागरणको आवश्यकता, राष्ट्रिय एकता र सांस्कृतिक संस्कारको संरक्षणका विषयमा विस्तृतरूपमा विचार–विमर्श गरिएको थियो ।
संघचालक तिम्सिनाले हिन्दु मूल्य–मान्यता र राष्ट्रिय पहिचानको संरक्षणका लागि नागरिक स्तरमा चेतना फैलाउन सबैलाई आह्वान गर्दै, आगामी गोष्ठीलाई सफल बनाउन सबै पक्ष एकजुट भएर लाग्नुपर्ने आवश्यकता औंल्याए ।
कार्यक्रमका क्रममा बारा र पर्सा जिल्लामा हुन गइरहेको प्रबुद्ध नागरिक गोष्ठीका कार्यक्रम रूपरेखा, संयोजन समिति गठन र प्रचार–प्रसार रणनीतिबारे पनि विस्तृत योजना तय गरिएको आयोजकले जानकारी दिएको छ ।
