वीरगंज । युनाइटेड क्रिकेट क्लब वीरगंजले शानदार प्रदर्शन गर्दै महागढीमाई मेयर कप क्रिकेट प्रतियोगिताको फाइनलमा प्रवेश गरेको छ । गढिमाई खेल मैदानमा बिहीबार सम्पन्न सेमिफाइनल खेलमा वीरगंजले भारतको मोतिहारीलाई २१ रनले पराजित गर्दै फाइनलमा स्थान सुरक्षित गरेको हो।
पहिले ब्याटिङ गरेको वीरगंजले २० ओभरमा ८ विकेटको क्षतिमा १३५ रनको लक्ष्य प्रस्तुत गरेको थियो । वीरगंजका वासिम मियाले १८ बलमा ३६ रन, सोनु अन्सारीले २९ बलमा २६ रन, र महमद एसले १३ बलमा २५ रनको योगदान दिए।
जवाफी ब्याटिङमा उत्रिएको मोतिहारी टिम १८.२ ओभरमै ११४ रनमा अलआउट भयो। मोतिहारीका युसुफले ४० बलमा ३८ रन, समीरले १२ बलमा २० रन, र मनिकान्तले १७ बलमा १६ रन बनाए पनि टोलीलाई जित दिलाउन सकेनन्।
बलिङतर्फ वीरगंजका सन्तोष कार्कीले ३.२ ओभरमा १७ रन खर्चिएर ४ विकेट, समसाद अलिले ४ ओभरमा १८ रनमा ३ विकेट, र चन्दन रामले २ ओभरमा २२ रनमा २ विकेट लिँदै उत्कृष्ट प्रदर्शन गरे।
खेलमा प्रभावशाली बलिङ प्रदर्शनका लागि सन्तोष कार्कीलाई म्यान अफ दि म्याच घोषित गरिएको छ । अब वीरगंजले फाइनलमा उपाधि जित्ने लक्ष्यसहित मैदानमा उत्रने तयारी गरेको छ।
