काठमाडौँ । नेपाल कम्युनिष्ट पार्टी (एकीकृत समाजवादी) ले आगामी फागुन २१ गते हुने निर्वाचनका लागि तयारी तीव्र बनाउने निर्णय गरेको छ । पार्टी अध्यक्ष माधवकुमार नेपालको अध्यक्षतामा शुक्रबार बसेको सचिवालय बैठकले निर्वाचन तयारीसँगै देशभरका जनवर्गीय सङ्गठनहरूलाई सक्रिय बनाउने निर्णय गरेको हो।
पार्टीका केन्द्रीय उपाध्यक्ष तथा प्रचार विभाग प्रमुख प्रकाश ज्वालाका अनुसार संविधान र लोकतान्त्रिक प्रणालीको संरक्षणका लागि निर्वाचनमा सहभागी हुने निर्णय गरिएको हो । उनले भने, “निर्वाचन अगाडि समान विचारधारा भएका दलहरू तथा वाम समाजवादी शक्तिबीच सहकार्य र एकताको दिशा टुङ्गो लगाउने कार्यसूची बैठकले पारित गरेको छ।”
बैठकमा मुलुकको समसामयिक राजनीतिक स्थिति, पछिल्ला घटनाक्रम, र जनवर्गीय सङ्गठनहरूको कार्यगत प्रगतिबारे विस्तृत समीक्षा गरिएको प्रचार विभाग प्रमुख ज्वालाले जानकारी दिए ।
यसअघि पार्टीले गत भदौ अन्तिम साता स्थायी समिति, पोलिटब्युरो र केन्द्रीय समिति बैठक बोलाएको भए पनि जेन्जी प्रदर्शनका कारण बैठक स्थगित भएको थियो।
