वीरगंज । एमाले निकट अखिल नेपाल राष्ट्रिय स्वतन्त्र विद्यार्थी यूनियन (अनेरास्ववियु) पर्साले वीरगंजस्थित हरिखेतान बहुमुखी क्याम्पसमा पठनपाठन सुचारू गर्न माग गर्दै प्रमुख जिल्ला अधिकारी तोयनारायण सुवेदीलाई ज्ञापनपत्र बुझाएको छ ।
अनेरास्ववियु पर्साका अध्यक्ष सुजित मण्डलको नेतृत्वमा बुझाइएको उक्त ज्ञापनपत्रमा क्याम्पसको आन्तरिक विवादका कारण विद्यार्थीहरूको अध्ययन रोकिएको र शैक्षिक वातावरण अस्तव्यस्त भएको उल्लेख गरिएको छ ।
संगठनले क्याम्पस समुदायिक स्वरूपको भएको र केही व्यक्तिहरूले निजी स्वार्थका लागि जातीय हवला दिँदै क्याम्पसको सम्पत्ति र आम्दानी हडप्ने प्रयास गरेको आरोप लगाएको छ । साथै, आन्तरिक विवाद तत्काल समाधान गरी पठनपाठन यथाशीघ्र सञ्चालन गर्न माग गरिएको छ ।
ज्ञापनपत्र बुझाउन जिल्ला प्रशासन कार्यालय पुगेकाे टाेलीमा अनेरास्ववियुका केन्द्रीय सदस्य आशिफ अहमद, जिल्ला अध्यक्ष सुजित मण्डल, सचिव पुकार सुवेदी, इकाई अध्यक्ष अरमान आलम, महानगर सह–सचिव आमान अन्सारी, अनिल हजरा लगायत विद्यार्थी तथा युवा नेताहरूको उपस्थिति रहेको थियो ।
अध्यक्ष मण्डलले शैक्षिक संस्थामा देखिएका बेथिति र निजीकरणका प्रयासविरुद्ध अनेरास्ववियु सशक्त रूपमा अघि बढ्ने चेतावनी पनि दिएका छन् ।
