वीरगंज । गोल्डेन भन्ने शिवम साह कानुको हत्या प्रकरणमा संलग्न थप एक जना बालकलाई प्रहरीले पक्राउ गरेको छ ।घटनापछि फरार रहेका मुख्य आरोपी १६ बर्षिय बालकलाई प्रकाउ गरिएकाे प्रहरीले जनाएकाे छ ।
पक्राउ परेका ती बालकविरुद्ध कर्तव्यज्यान सम्बन्धी मुद्दामा पर्सा जिल्ला अदालतबाट चार दिनको म्याद थप अनुमति लिएर थप अनुसन्धान भइरहेको जिल्ला प्रहरी कार्यालय पर्साका प्रवक्ता प्रहरी नायब उपरीक्षक किशोर लम्सालले जानकारी दिए । आराेपित बालक रहेका कारण उनकाे नाम र ठेगाना सार्वजनिक नगरिएकाे उनले वताए ।
प्रहरीका अनुसार वीरगंज मेलाकाे दिन असोज १४ गते बारा परवानीपुर गाउँपालिका–९ घर भई हाल वीरगंज महानगरपालिका–१० बस्ने २० वर्षीय शिवम साह कानु (गोल्डेन) घरबाट “गहवामाईको मेला हेर्न जान्छु” भन्दै निस्किएका थिए । सोही राति करिब ११:३० बजे उनीमाथि खुनी दरिन्दे समूहले कर्तव्य गरी हत्या गरेको थियो ।
यस अघि नै प्रहरीले गाेल्डेन हत्या अन्य आराेपति वीरगंज महानगरपालिका–.२४ रामगढवाका १९ वर्षीय गौतम पटेल,२० वर्षीय सुभांकर चौरसिया, २२ वर्षीय अमिरी पटेल भन्ने करण प्रसाद पटेल, २४ वर्षीय चन्दन चौरसिया र १९ वर्षीय अमन पटवा पक्राउ गरि मुद्दा दर्ता गरि सकेकाे छ ।
