काठमाडौं । गृह मन्त्रालयले देशभर आगामी दुई दिन सार्वजनिक विदा दिने घोषणा गरेको छ। जल तथा मौसम विज्ञान विभाग र राष्ट्रिय विपद् जोखिम न्यूनीकरण तथा व्यवस्थापन प्राधिकरणबाट प्राप्त जानकारी अनुसार असोज १८ देखि २० गतेसम्म देशका विभिन्न भागमा भारीदेखि अति भारी वर्षा हुने पूर्वानुमान भएकाले यस्तो निर्णय गरिएको हो।
मन्त्रालयले आज जारी गरेको सार्वजनिक सूचनामा भनिएको छ, “वर्षाका कारण बाढी, डुबान, भू–क्षय लगायतका जोखिम उच्च रहेको र सडक तथा हवाई यातायातमा असर पर्ने सम्भावना भएकाले असोज १९ र २० गते नेपाल राज्यभर सार्वजनिक विदा दिने निर्णय गरिएको छ।”
सार्वजनिक विदा अवधिमा विपद् व्यवस्थापन र अत्यावश्यक सेवासँग सम्बन्धित कार्यालयहरू भने सञ्चालनमा रहनेछन्।
गृह मन्त्रालयका सहसचिव तथा प्रवक्ता आनन्द काफ्लेले जारी गरेको सूचनामा सबै नागरिकलाई अनावश्यक रूपमा घर बाहिर ननिस्कन, सुरक्षित स्थानमा बस्न र सम्बन्धित निकायका निर्देशनहरू पालना गर्न अनुरोध गरिएको छ।
सूचनामा देशभर बढ्दो वर्षा र सम्भावित विपद् जोखिमका बीच सतर्क रहन सबै पक्षलाई सचेत गराइएको छ।
