काठमाडौं । राष्ट्रिय विपद् जोखिम न्यूनीकरण तथा व्यवस्थापन प्राधिकरणले देशभर भइरहेको अविरल वर्षाका कारण पहिरो, डुबान र बाढीको जोखिम बढेको भन्दै आगामी तीन दिनसम्म लामो दूरीका सवारी साधन सञ्चालन नगर्न अनुरोध गरेको छ।
प्राधिकरणले आज एक सार्वजनिक सूचना जारी गर्दै काठमाडौं उपत्यकामा भित्रिने र यहाँबाट बाहिरिने सबै प्रकारका सवारी साधन अस्थायी रूपमा रोक्न सम्बद्ध निकायहरूलाई आग्रह गरेको छ।
सूचनामा भनिएको छ, “भारी वर्षाका कारण सडक अवरोध, पहिरो र डुबानको जोखिम उच्च भएकाले सवारी साधनको आवागमन रोक्दा जनधनको सुरक्षा सुनिश्चित गर्न सहयोग पुग्नेछ।”
प्राधिकरणले यस निर्णयको प्रभावकारी कार्यान्वयनका लागि सम्बन्धित जिल्ला प्रशासन कार्यालयहरू र सुरक्षा निकायलाई आवश्यक अनुगमन र संयोजन गर्न पनि निर्देशन दिएको छ।
साथै, नागरिकहरूलाई अनावश्यक यात्रा नगर्न, मौसम पूर्वानुमान र सम्बन्धित निकायका सूचना नियमित रूपमा पालन गर्न अनुरोध गरिएको छ।
