काठमाडौँ । गत भदौ २३ र २४ गते भएको ‘जेनजी’ प्रदर्शनका क्रममा भएका घटनासम्बन्धी जाँचबुझ आयोगले नेपाल कम्युनिष्ट पार्टी (एमाले)का अध्यक्ष तथा पूर्वप्रधानमन्त्री केपी शर्मा ओलीसहित पाँच जनालाई विदेश भ्रमणमा रोक लगाएको छ।
आयोगको बैठकले अनुसन्धानको दायरामा रहेका कारण पूर्वगृहमन्त्री रमेश लेखक, पूर्वगृह सचिव गोकर्णमणि दुवाडी, पूर्वराष्ट्रिय अनुसन्धान विभाग प्रमुख हुतराज थापा र काठमाडौँका पूर्वप्रमुख जिल्ला अधिकारी छविलाल रिजाललाई समेत विदेश भ्रमणमा रोक लगाउने निर्णय गरेको हो।
आयोगले जारी गरेको विज्ञप्तिमा भनिएको छ, “भाद्र २३ र २४ गतेका घटनाको छानबिन तथा जाँचबुझको सिलसिलामा अनुसन्धानको दायरामा रहेका व्यक्तिहरूको विदेश भ्रमण रोक लगाउन आवश्यक कारबाही गर्न सम्बन्धित निकायमा पत्राचार गरिएको छ। साथै, छानबिनका क्रममा कुनै पनि समयमा आयोगमा उपस्थित हुनुपर्ने भएकाले आयोगको स्वीकृतिबेगर काठमाडौँ उपत्यका छाड्न नपाउने व्यवस्था गर्न गराइनेछ।”
त्यसैगरी, आयोगले छानबिन प्रभावकारी बनाउन विज्ञसहितको जनशक्ति आवश्यक देखिएकाले त्यसको व्यवस्थापनका लागि गृह मन्त्रालयमा पत्राचार गर्ने निर्णय गरेको विज्ञप्तिमा उल्लेख छ।
