वीरगंज । वीरगंज महानगरपालिका–२२ जगरनाथपुर चोकस्थित ढाटमा अवैध असुली रोक्न सरोकारवाला निकायहरू उदासिन देखिएका छन् । अमित ठेक्का पट्टाका कर्मचारीहरूले कबाडी कर असुलीको नाममा खाली गाडीहरूसँग समेत अवैध रकम उठाइरहँदा पनि सम्बन्धित निकायहरूको ध्यान पुगेको छैन ।
स्थानीयवासीका अनुसार वीरगंज महानगरपालिका, जिल्ला प्रशासन कार्यालय र जिल्ला प्रहरी कार्यालय पर्सालाई पटक–पटक जानकारी गराउँदा पनि कुनै कारवाही भएको छैन । ठेक्दार कम्पनीले “जडिबुटी, कबाडी तथा जीवजन्तु कर” उठाउने नाममा दिनदहाडै रंगदारी टेक्स असुली गरिरहेको छ ।
नियमअनुसार कुनै पनि राजमार्गमा स्थानीय तहको ठेक्का लगाउन नपाउने व्यवस्था भए पनि महानगरपालिकाले दिएको ठेक्का सम्झौता विपरीत ढाटका कर्मचारीहरूले अवैध कर असुली गरिरहेका छन् । सम्झौताअनुसार उत्पादन संकलन तथा व्यवसायिक कारोबारमा मात्रै कर लिन पाउने व्यवस्था छ । तर भारतीय मालवाहक तथा नेपाली सवारीसाधन दुवैबाट प्रतिगाडी ४ सयदेखि ७ सय रुपैयाँसम्म असुली भइरहेको छ ।
ढाटका कर्मचारीहरूले रसिद ४ सयको दिए पनि २८० भारु लिने गरेका छन्, जसको नेपाली मूल्य ४४८ रुपैयाँ हुन्छ । अवैध असुली नदिने सवारी चालकहरूमाथि दुर्व्यवहार हुने गरेको छ भने बारम्बार कुटपिट र झैझगडा समेत हुने गरेको छ । केही दिनअघि अवैध असुलीको विरोध गर्ने क्रममा एक जेष्ठ नागरिकमाथि कुटपिट समेत गरिएको थियो ।
यस बिषयमा कयाैं पटक विभिन्न संचारमाध्यमा समाचार प्रकाशनमा आएपनि सम्बन्धित निकायकाे ध्यान नपुग्नुले पनि सबै सराेकारवालाहरुकाे पनि मिलाेमताे रहेकाे प्रमाणित हुन थालेका छन् । जेन जि आन्दोलनपछि परिवर्तनको आश बोकेका स्थानीय बासिन्दाले अझै केही सुधार नआएको भन्दै चिन्ता समेत व्यक्त गरेका छन् ।
