वीरगंज । जेन-जि आन्दोलनका क्रममा केन्द्रिय कारागार जगन्नाथदेवल, काठमाडौँबाट फरार भएका कर्तव्यज्यान मुद्दाका कैदी मुक्तिनारायण कुर्मी पक्राउ परेका छन् ।
विशेष सूचनाको आधारमा जिल्ला प्रहरी कार्यालय पर्सा मातहत इलाका प्रहरी कार्यालय पोखरियाबाट खटिएको प्रहरी टोलीले पर्साको कालिकामाई गाउँपालिका–५ सिमरामा उनको घरमै छापामारी गरी पक्राउ गरेको हो ।
४० वर्षीय कुर्मीले आफ्नै श्रीमती ३५ वर्षीया संगिता देवी कुर्मीलाई घाँटी थिची हत्या गरेको मुद्दामा पर्सा जिल्ला अदालतबाट २५ वर्ष कैद सजाय पाएका थिए । भदौ २४ गते जेन-जि आन्दोलनको क्रममा काठमाडौँको जगन्नाथदेवलस्थित केन्द्रिय कारागारबाट फरार भएका उनी आफ्नै गाउँघरमा लुकीछिपी बस्दै आएको थियाे ।
मंगलबार साँझ ७:३० बजे पक्राउ परेका कुर्मीलाई आवश्यक कारबाहीपछि सम्बन्धित कारागार कार्यालयमा पठाउने प्रक्रिया चलिरहेको जिल्ला प्रहरी कार्यालय पर्साका प्रवक्ता प्रहरी नायब उपरीक्षक हरि बहादुर बस्नेतले जानकारी दिए ।
