वीरगंज । पर्सास्थित बाल सुधारगृह तोडफोड गरी भागेका ५० जना बालबिज्याइँकर्ता किशोर अझैसम्म पनि फरार रहेका छन् । गत भदौ २४ गते राति बाल सुधारगृह तोडफोड गरेर भागेका ती किशोरमध्ये केहीलाई प्रहरीले पक्राउ गरे पनि आधाभन्दा बढी अझै नियन्त्रणमा आएका छैनन् ।
बाल सुधारगृहका कार्यालय प्रमुख टीकाकृष्ण काफ्लेका अनुसार उक्त रात १४२ जना किशोर राखिएका थिए । तीमध्ये अहिले सुधारगृहमा ९० जना मात्रै रहेका छन् भने सिरहा प्रहरीले दुई जनालाई पक्राउ गरेको छ । “भदौ २४ गतेको घटनापछि हालसम्म १७ जना पक्राउ परेका छन्,” काफ्लेले बताए, “तर ५० जना अझै सम्पर्कमा आएका छैनन्, उनीहरुको खोजी तीव्र पारिएको छ ।”
काफ्लेले फरार किशोरको खोजीका लागि अभिभावकहरूसँग नियमित समन्वय भइरहेको र चाँडै नै उनीहरू नियन्त्रणमा आउने विश्वास लिइएको बताए ।
