वीरगंज । नेपाली कांग्रेसका केन्द्रीय सदस्य एवं पूर्वमन्त्री रमेश रिजालले पार्टीलाई कार्यसम्पादन समितिको निर्णयअनुसार अगाडि बढाउने बताएका छन्।
पार्टी मुख्यालय सानेपामा सञ्चारकर्मीहरूसँग कुरा गर्दै उनले जेन–जी पुस्ताको आन्दोलनले पार्टी संरचनामा पुर्याएको क्षति निन्दनीय भएको भन्दै खेद व्यक्त गरे। साथै, उनले युवा पुस्ताको माग र सहभागितालाई सम्बोधन गर्ने गरी पार्टी अघि बढ्ने प्रतिबद्धता जनाए।
गत भदौ २३ र २४ गते भएको जेन–जी पुस्ताको आन्दोलनका क्रममा नेपाली कांग्रेसको केन्द्रीय कार्यालयसहित अधिकांश जिल्ला र प्रदेश कार्यालयमा क्षति पुगेको थियो। उक्त घटनाले पार्टीभित्र नेतृत्व हस्तान्तरणको बहसलाई तीव्र बनाएको छ।
रिजालका अनुसार पार्टीको कार्यसम्पादन समितिको बैठकले विशेष महाधिवेशन गर्ने वा नगर्ने विषयमा छिट्टै निर्णय गर्नेछ। “पार्टीमाथि भएको आक्रमण सर्वथा निन्दनीय छ। आगामी दिनमा दोस्रो तहका नेताहरूले नेतृत्वको सम्भावना बोकेका छन्,” रिजालले भने, “जेन–जी पुस्ताको मागलाई सम्बोधन गर्न हामी गम्भीर छौँ।”
नेपाली कांग्रेसले आगामी दिनमा युवा पुस्ताको सहभागिता र उनीहरूका मागलाई प्राथमिकता दिँदै पार्टीलाई थप गतिशील र समावेशी बनाउने संकेत गरेको छ। कार्यसम्पादन समितिको आगामी बैठकले पार्टीको भावी रणनीति र नेतृत्व हस्तान्तरणबारे महत्त्वपूर्ण निर्णय लिने अपेक्षा गरिएको छ।
