काठमाडौं । आम जनता पार्टी (आजपा) का अध्यक्ष तथा पूर्वमन्त्री प्रभु साहले प्रदेश र स्थानीय सरकार खारेज गरी ‘भ्रष्ट’ प्रशासनमाथि कडा कदम चाल्नुपर्ने माग गरेका छन् । शनिबार काठमाडौंमा सुरु भएको आजपाको केन्द्रीय कमिटी बैठकलाई सम्बोधन गर्दै साहले वर्तमान प्रणालीलाई भ्रष्ट र असफल बताउँदै यसलाई नबदली मुलुक नबन्ने तर्क गरेका हुन् ।
उनका अनुसार सरकारमात्रै भ्रष्ट भएकाले त्यस्ता सरकारलाई खारेज गरेर संघीयतालाई अझै बलियो बनाइनुपर्ने छ । ‘बिग्रिएको व्यवस्था भत्काउँदै भ्रष्ट नेताहरूलाई नहटाएसम्म मुलुक नबन्ने’ भन्दै साहले विद्यमान संरचनाको समीक्षा गर्नुपर्ने आवश्यकता औँल्याए ।
साहले देशमा मौलाएको भ्रष्टाचार, कुशासन, अनियमितता र लुटपाट रोक्न आजपाले दुई वर्षअघि तेस्रो जनआन्दोलनको घोषणा गरेको स्मरण गर्दै अहिले जेन–जी पुस्ताले जनविद्रोह गर्नु सकारात्मक भएको बताए ।
‘मुलुकमा भ्रष्टाचार, कुशासन र दलहरूको लुटकारी प्रवृत्तिका कारण राष्ट्रियता, लोकतन्त्र र अर्थतन्त्र धरासायी भएका छन्,’ साहले भने, ‘त्यसैले संविधान र व्यवस्था गलत भएकाले जनताको अवस्था खराब भएको स्वीकार गर्नुपर्दछ र आवश्यक परे संविधान खारेज गरेर समेत जेनजीको माग सम्बोधन गर्नुपर्छ।’
साहले संसद, सर्वोच्च अदालत र सिंहदरबारजस्ता संस्थाहरूमा षड्यन्त्रपूर्ण आक्रमण भएको दाबी गर्दै उच्चस्तरीय छानबिनको माग गरे । साथै, उनले जेनजी आन्दोलनलाई अपहरण गर्ने र युवाहरूको भावनालाई धोका दिने प्रयास भइरहेको आरोप पनि लगाए ।
त्यसैगरी उनले परराष्ट्र र रक्षा मन्त्रालयको नेतृत्वविहीनतालाई प्रश्न उठाउँदै सुरक्षा निकाय र तिनका नेतृत्वहरूको भूमिकाको समिक्षा गर्नुपर्ने आवश्यकता औंल्याए ।
