काठमाडौँ । नेपाली कांग्रेसले तत्काल कसैलाई पनि कार्यवाहक सभापति नदिने र विशेष महाधिवेशन नगर्ने निर्णय गरेको छ। पार्टी केन्द्रीय कार्यालय सानेपामा बसेको कार्यसम्पादन समिति बैठकले यो निर्णय गरेको सहमहामन्त्री महेन्द्र यादवले जानकारी दिए।
सहमहामन्त्री यादवका अनुसार सभापति शेरबहादुर देउवा स्वस्थ भएपछि मात्र केन्द्रीय समिति बैठक बोलाई यस विषयमा विस्तृत छलफल गर्ने तयारी छ। देउवा जेनजी आन्दोलनका क्रममा गत भदौ २४ गते आफ्नै निवास बुढानीलकण्ठमा कुटिएका थिए र अहिले उपचाररत छन्।
“सबै विषयमा सभापति स्वस्थ भएपछि कुराकानी हुन्छ। उहाँ स्वस्थ भएपछि केन्द्रीय समिति बैठक बोलाइने र त्यही बैठकमा छलफल गरिने निर्णय भएको छ,” यादवले बताए।
यसै बैठकले सभापति देउवा र उनकी पत्नीको शीघ्र स्वास्थ्यलाभको कामना गरेको छ। साथै पार्टीभित्रका अन्य विषयमा पनि देउवा स्वस्थ भएपछि मात्र निर्णायक छलफल हुने उल्लेख गरिएको छ।
