जनकपुरधाम । संविधान दिवसको अवसरमा मधेश प्रदेशका मुख्यमन्त्री सतिश कुमार सिंहले सम्पूर्ण मधेश प्रदेशवासी तथा देशवासीलाई शुभकामना व्यक्त गर्दै संविधानलाई संघर्ष, बलिदान र त्यागको जीवन्त प्रतीकका रूपमा स्मरण गरेका छन् ।
शुभकामना सन्देशमार्फत मुख्यमन्त्री सिंहले जनआन्दोलन, मधेश आन्दोलन, जनयुद्ध र पछिल्लो जेन–जी आन्दोलनलगायत विभिन्न आन्दोलनमा जीवन अर्पण गर्ने सहिदहरूलाई श्रद्धाञ्जलि अर्पण गर्दै उनीहरूको बलिदानकै कारण आजको लोकतान्त्रिक, संघीय गणतान्त्रिक संविधान सम्भव भएको उल्लेख गरे।
“यो संविधान केवल कानुनी दस्तावेज मात्र नभई हाम्रो संघर्ष, बलिदान र त्यागको जीवन्त प्रतीक हो। संघीय लोकतान्त्रिक गणतन्त्रको बाटो जनताकै संघर्षबाट कोरिएको हो,” सिंहले भने।
उनले संघीयताको जन्मभूमि मधेश रहेको उल्लेख गर्दै संविधानले प्रदेश र स्थानीय तहमार्फत जनतालाई नजिकबाट सेवा पुर्याउने बाटो खोलेको बताए । समावेशिता र समानुपातिक व्यवस्थाले सबै वर्ग, क्षेत्र र समुदायलाई राज्य सञ्चालनमा सहभागी हुने न्यायपूर्ण अवसर सुनिश्चित गरेको पनि उनले जोड दिए ।
“संविधानलाई अझ सबल बनाउन, संघीयतालाई प्रभावकारी बनाउन र लोकतन्त्रलाई अझ मजबुत बनाउन हामी सबैले साझा जिम्मेवारी निर्वाह गर्नुपर्छ,” मुख्यमन्त्री सिंहले भने, “संघीयता हाम्रो गौरव, समावेशिता हाम्रो शक्ति र संविधान हाम्रो साझा बन्धन हो।”
संविधान दिवसको ऐतिहासिक अवसरमा पुनः सम्पूर्ण देशवासीलाई शुभकामना व्यक्त गर्दै उनले आफ्नो सन्देशको अन्त्य गरे।
