काठमाडौँ । पूर्वप्रधानमन्त्री तथा नेकपा (एकीकृत समाजवादी)का अध्यक्ष माधवकुमार नेपालले संविधानको कार्यान्वयनमा देखिएका कमजोरीहरूको वस्तुनिष्ठ समीक्षा गरी मुलुकलाई सुशासन र समृद्धितर्फ अगाडि बढाउनुपर्ने बताएका छन्।
संविधान दिवसको अवसरमा शुभकामना सन्देश जारी गर्दै अध्यक्ष नेपालले शान्ति, स्थिरता र विकास सुनिश्चित गर्दै भ्रष्टाचारको अन्त्य, सुशासनको प्रवर्द्धन र व्यापक रोजगारी सिर्जनासहित आर्थिक–सामाजिक रुपान्तरण अपरिहार्य रहेको उल्लेख गरे।
उहाँले सङ्घीय लोकतान्त्रिक गणतन्त्रको स्थापनाका लागि भएका आन्दोलन र हालै सम्पन्न जेनजी आन्दोलनमा जीवन अर्पण गर्ने सहिदहरूलाई श्रद्धाञ्जलि अर्पण गर्दै लोकतान्त्रिक मूल्य–मान्यताको रक्षा र कार्यान्वयनमा सबै जिम्मेवार बन्नुपर्नेमा जोड दिए।
सन्देशमा अध्यक्ष नेपालले प्रतिस्पर्धात्मक बहुदलीय लोकतान्त्रिक शासन प्रणाली, नागरिक स्वतन्त्रता, मौलिक अधिकार, मानव अधिकार, आवधिक निर्वाचन, पूर्ण प्रेस स्वतन्त्रता, स्वतन्त्र र सक्षम न्यायपालिका तथा कानुनी राज्यको अवधारणालगायत लोकतान्त्रिक मूल्य र मान्यताहरूलाई नेपालको संविधानले समेटेको उल्लेख गरेका छन्।
उहाँले संविधान जारी भएपछि मुलुकको शासनसत्तामा ठूलो परिवर्तन भए पनि संविधान निर्माण गर्दा परिकल्पना गरिएको सुशासन, आर्थिक समृद्धि र समुन्नत राष्ट्र निर्माणको यात्राले अझै अपेक्षित गति लिन नसकेको बताए।
