काठमाडौँ । मुलुकमा विकसित पछिल्ला घटनाक्रमबारे नेपाली कांग्रेसले आफ्नो आधिकारिक धारणा सार्वजनिक गरेको छ। जेएनजी पुस्ताको प्रदर्शन, त्यस क्रममा भएको मृत्यु, खर्बौं मूल्य बराबरको संरचनाको विनाश, कांग्रेस सभापति शेरबहादुर देउवा र केन्द्रीय सदस्य डा. आरजु राणा देउवासहितका नेतामाथिको आक्रमण, राष्ट्रपतिद्वारा गरिएको संवाद पहल, अन्तरिम प्रधानमन्त्रीको घोषणा र प्रतिनिधिसभा विघटनजस्ता विषयमा पार्टीले आफ्नो धारणा सार्वजनिक गरेको हो।
उपसभापति पूर्णबहादुर खड्काद्वारा जारी विज्ञप्तिमा भाद्र २३ र २४ गतेको आन्दोलनमा ज्यान गुमाउने युवाहरू र सुरक्षाकर्मीप्रति श्रद्धाञ्जली अर्पण गरिएको छ। त्यस्तै आन्दोलनमा भएका भौतिक क्षतिको वास्तविक मूल्याङ्कन तत्काल सुरु गर्न सरकारलाई माग गरिएको छ।
विज्ञप्तिमा पार्टी सभापति शेरबहादुर देउवा र केन्द्रीय सदस्य डा. आरजु राणा देउवासहित अन्य नेतामाथि भएको आक्रमणलाई निन्दनीय र भत्र्सना योग्य भन्दै शीघ्र स्वास्थ्यलाभको कामना गरिएको छ।
त्यसैगरी, प्रतिनिधिसभाको विघटनलाई पार्टीले असंवैधानिक र अलोकतान्त्रिक भन्दै तत्कालै निर्णय फिर्ता गर्न सरकारलाई आग्रह गरेको छ। पार्टीले संविधान र लोकतन्त्रको रक्षा गर्दै स्पष्ट धारणा बनाएर अघि बढ्ने प्रतिबद्धता पनि व्यक्त गरेको छ।
नेपाली कांग्रेसले सम्पूर्ण नेपाली दिदीबहिनी, दाजुभाइ र युवाहरूको भावनालाई सम्मान गर्दै विद्यमान राजनीतिक घटनाक्रममा एकताबद्ध भएर अघि बढ्ने अठोट जनाएको छ।
