काठमाडौं । नेपाल पत्रकार महासंघले राष्ट्रपतिबाट संविधान विपरीत प्रधानमन्त्री नियुक्ति र त्यसपश्चात प्रतिनिधिसभा विघटन सिफारिसलाई असंवैधानिक र अलोकतान्त्रिक भन्दै घोर निन्दा र भत्र्सना गरेको छ। महासंघका महासचिव रामप्रसाद दाहालद्वारा जारी विज्ञप्तिमा लोकतन्त्र, संविधानवाद, विधिको शासन, मानव अधिकार, प्रेस तथा अभिव्यक्ति स्वतन्त्रता जस्ता उपलब्धिमा आघात पुग्ने चेतावनी दिइएको छ।
महासंघको विज्ञप्तिमा भनिएको छ कि २०६२/६३ को जनआन्दोलनपछि मुलुकले संविधानसभामार्फत संविधान लेख्ने चाहना पूरा गरेको थियो र हालैको जेनेजि आन्दोलनले भ्रष्टाचार र बेथितिविरुद्धको मागलाई संविधानको दायरामा राख्दै उन्नत लोकतान्त्रिक अभ्यासमा अगाडि बढ्ने अवसर दिएको थियो। तर राष्ट्रपतिबाट संविधान विपरीत प्रधानमन्त्री नियुक्ति र मध्यरातमा प्रतिनिधिसभा विघटन सिफारिस सदर गर्नु जनमतको अपमान र अलोकतान्त्रिक कदम भएको महासंघको ठहर छ।
महासंघले यस्ता कदमहरूले मुलुकको लोकतान्त्रिक प्रणाली, संवैधानिक सर्वोच्चता, नागरिकका अधिकार, प्रेस स्वतन्त्रता, संघीयता र समावेशिता जस्ता उपलब्धिमा प्रत्यक्ष आघात पुर्याउने भन्दै वर्तमान संविधान र उपलब्धिहरूको रक्षार्थ सबै पक्ष एकजुट हुन आह्वान गरेको छ।
