काठमाडौं । Gen Z पुस्ताले आह्वान गरेको आन्दोलन नियन्त्रणबाहिर गएपछि प्रधानमन्त्री केपी शर्मा ओलीले पदबाट राजीनामा दिएका छन्।
उनको सचिवालयले मंगलबार प्रधानमन्त्री ओलीले पदत्याग गरेको जानकारी दिएको हो । शीतल निवासले पनि प्रधानमन्त्रीको राजीनामापत्र राष्ट्रपतिसमक्ष पुगिसकेको पुष्टि गरेको छ।
प्रधानमन्त्री ओलीले मुलुकमा उत्पन्न असमान्य परिस्थितिलाई ध्यानमा राख्दै संविधान सम्मत राजनीतिक निकासका र समस्या समाधनको थप पहलको लागि संविधानको धारा ७७ (१) क बमोजिम आजैका मितिदेखि लागु हुनेगरी प्रधानमन्त्री पदबाट राजीनामा दिएको जनाएका छन् ।
देशभर चर्किएको आन्दोलन, दर्जनौंको मृत्यु र सरकारभित्रै बढ्दो असहमतिकाबीच आएको प्रधानमन्त्रीको राजीनामाले अबको राजनीतिक परिदृश्य झन् संवेदनशील बन्ने अनुमान गरिएको छ।
