काठमाडाैं । नेकपा (एकीकृत समाजवादी) का अध्यक्ष तथा पूर्वप्रधानमन्त्री माधवकुमार नेपालले सामाजिक सञ्जालमाथि गरिएको नियन्त्रण, भ्रष्टाचार र कुशासनविरुद्ध जेन जेड पुस्ताले गरेको आन्दोलनमा भएको बर्बर दमन र नरसंहारप्रति कडा आपत्ति जनाएका छन्।
सोमबार जारी विज्ञप्तिमा अध्यक्ष नेपालले निहत्था युवामाथि गरिएको सरकारी दमनलाई “जति निन्दा गरे पनि कम हुने” बताएका छन्। उनले आन्दोलनमा ज्यान गुमाउनेप्रति श्रद्धाञ्जली अर्पण गर्दै शोकसन्तप्त परिवारप्रति समवेदना व्यक्त गरेका छन्। साथै, घाइतेहरूको शीघ्र स्वास्थ्यलाभको कामना पनि गरेका छन्।
नेपालले सरकारको दमनकारी, अहंकारी र हेपाहा कार्यशैलीकै कारण यो विभत्स घटना भएको दाबी गर्दै प्रधानमन्त्रीलाई तत्काल राजीनामा दिनुपर्ने माग गरेका छन्। साथै, घटनाका सबै दोषी पहिचान गरी कारबाही गर्न उच्चस्तरीय न्यायिक आयोग तत्काल गठन गर्नुपर्नेमा जोड दिएका छन्।
उनले भने, “Gen Z युवाले उठाएका जायज मागहरूलाई सम्बोधन नगरी उल्टो दमन र अपमान गर्ने कार्य अमानवीय हो। म र हाम्रो पार्टी युवाहरूको आन्दोलनसँग पूर्ण समर्थनमा छौं।”
अध्यक्ष नेपालले जारी आन्दोलनलाई संयमित र जिम्मेवार ढंगले सञ्चालन गर्न सम्बद्ध पक्षहरूलाई आग्रह गर्दै निष्कर्षमा पुग्नुपर्नेमा जोड दिएका छन्।
