वीरगंज । जिल्ला प्रहरी कार्यालय पर्साले लागुऔषध विरुद्धको जनचेतना अभियानअन्तर्गत भव्य मोटरसाइकल तथा गाडी र्याली निकाल्दै विशेष कार्यक्रम गर्न लागेको छ।
मिति २०८२ भदौ २३ गते साेमबार बिहान ७:०० बजे वीरगंज महानगरपालिका–३२ स्थित मिलनचोकबाट सुरु हुने र्याली बडनिहार, मनवा, रंगपुर, श्रीपुर, पटेर्वासुगौली, निचुटा, मनिहर्वा, नौकाटोला, सेढवा हुँदै सुपौलीस्थित परसवा खेलमैदानमा पुगेर सम्पन्न हुने जिल्ला प्रहरी कार्यालय पर्साले जनाएकाे छ ।
कार्यक्रममा प्रमुख जिल्ला अधिकारी तोय नारायण सुवेदी, नेपाल प्रहरी प्रदेश कार्यालय वीरगंजका प्रमुख प्रहरी वरिष्ठ उपरीक्षक शान्तिराज कोइराला, जिल्ला प्रहरी कार्यालय पर्साका प्रमुख प्रहरी उपरीक्षक गौतम मिश्र लगायत स्थानीय जनप्रतिनिधि, भद्रभलादमी, समाजसेवी तथा विभिन्न संघसंस्थाका पदाधिकारीहरूको विशेष उपस्थिति रहनेछ।
जिल्ला प्रहरी कार्यालय पर्साले लागुऔषध दुव्र्यसनविरुद्ध सबैलाई सचेत बनाउन आयोजित अभियानमा गरिमामय उपस्थिति जनाउन अनुरोध गरेको छ । दुई दिन पहिला मात्र शुक्रबार मानव बेचबिखन तथा ओसारपसारविरुद्धको राष्ट्रिय दिवसका अवसरमा महिला, बालबालिका तथा जेष्ठ नागरिक मन्त्रालयले जिल्ला प्रहरी कार्यालय पर्साका प्रमुख प्रहरी उपरीक्षक (एसपी) गौतम मिश्रलाई सम्मान गरेको थियाे ।
