काठमाडौं । आम जनता पार्टी (आजपा)का अध्यक्ष एवं पूर्वमन्त्री प्रभु साह शनिबार छिमेकी मुलुक भारतको राजधानी नयाँ दिल्ली प्रस्थान गरेका छन्। काठमाडौंस्थित त्रिभुवन अन्तर्राष्ट्रिय विमानस्थलबाट उहाँ नयाँ दिल्लीतर्फ प्रस्थान गर्नुभएको हो।
‘प्रवासी नेपालीहरूको सम्मान र सुरक्षाका लागि’ आम प्रवासी नेपाली एकता समाजले आइतबार नयाँ दिल्लीमा आयोजना गर्न लागेको भेला तथा अन्तरक्रिया कार्यक्रममा अध्यक्ष साह सहभागी हुने कार्यक्रम रहेको छ। आजपा निकट प्रवासी नेपाली एकता समाज भारत शाखाले आयोजना गर्न लागेको सो कार्यक्रममा दिल्लीमा विभिन्न पेशा–व्यवसायमा संलग्न नेपालीहरूको सहभागिता रहने बताइएको छ।
यसअघि साह भारतको मुम्बईमा आयोजित प्रवासी नेपालीहरूको कार्यक्रममा समेत सहभागी भएका थिए । हाल आजपा नेपालभित्र मात्र नभई विदेशमा पनि कमिटी विस्तार गर्ने क्रममा रहेको छ।
दिल्लीमा हुने भेलासँगै अध्यक्ष साहले त्यहाँ रहेका नेपाली उद्योगी, व्यापारी, विद्यार्थी आदिसँग समेत भेटघाट गर्ने कार्यक्रम रहेको उहाँको सचिवालयले जनाएको छ। आठ वर्षपछि साह पहिलो पटक दिल्ली पुगेका हुन्।
दिल्लीको कार्यक्रमपछि आजपाले मलेसिया, दुबई, कतारलगायत मुलुकमा पनि संगठन विस्तार गर्दै विभिन्न कार्यक्रम आयोजना गर्ने योजना रहेको छ।
