काठमाडौं । नेपाल पत्रकार महासंघले नेपालमा दर्ता नभएका सामाजिक सञ्जाल बन्द गर्ने सरकारको निर्णयप्रति गम्भीर असहमति जनाउँदै उक्त निर्णय तत्काल फिर्ता लिन माग गरेको छ। महासंघले यो कदमले प्रेस तथा अभिव्यक्ति स्वतन्त्रतामाथि प्रत्यक्ष संकुचन ल्याउने चेतावनी दिएको छ।
महासंघका महासचिव रामप्रसाद दाहालले बिहीबार जारी गरेको प्रेस विज्ञप्तिमा सञ्चार तथा सूचना प्रविधि मन्त्रालयले तत्काल प्रभावले सामाजिक सञ्जाल बन्द गर्ने निर्णय नागरिकको सूचना पाउने हक र प्रेस स्वतन्त्रतामाथि नकारात्मक असर पार्ने उल्लेख गरिएको छ। कुनै वैकल्पिक व्यवस्था नगरी सामाजिक सञ्जाल बन्द गर्नु नागरिकको मौलिक हकप्रति धक्का भएको भन्दै महासंघले सरकारको कदमप्रति आश्चर्य व्यक्त गरेको छ।
विज्ञप्तिमा सामाजिक सञ्जाललाई व्यवस्थित र नियमन गर्नुपर्ने पक्षमा महासंघ पनि रहेको तर प्रेस तथा अभिव्यक्ति स्वतन्त्रतामा प्रतिकूल असर पर्ने गरी सञ्चार माध्यमलाई नियन्त्रण गर्ने प्रयास अस्वीकार्य हुने स्पष्ट पारिएको छ। साथै, महासंघले नागरिकको सूचनाको हकलाई सम्मान गर्दै लगाइएको प्रतिबन्ध हटाउन र लोकतान्त्रिक मूल्य–मान्यताको रक्षा गर्न सरकारसँग जोडदार माग गरेको छ।
