वीरगंज । मधेस प्रदेश स्तरीय किशोर–किशोरी भेला २०८२ बर्दिबासस्थित रेड क्राउन होटलमा बिहिबार सम्पन्न भएको छ । किशोर राष्ट्रिय किशोर सञ्जाल र राष्ट्रिय किशोरी सञ्जालकाे आयोजनामा भएकाे कार्यक्रमकाे संयोजक सिविन नेपाल र Girls Not Brides संस्था रहेका थिए । कार्यक्रममा Save the Children ले सहयोग गरेको थियो।
राष्ट्रिय किशोरी सञ्जालकी महासचिव कृतिका धितालकाे अध्यक्षता र खेलकुद तथा समाज कल्याण मन्त्री प्रमोद जयसवाल प्रमुख आतिथ्यतामा कार्यक्रम भएकाे थियाे । कार्यक्रममा सिविन नेपालका अध्यक्ष माधव प्रधान, NIRN Nepal का अध्यक्ष भिक्षु पियादशी, Girls Not Brides Nepal की अध्यक्ष निरजिना भट्ट, राष्ट्रिय किशोर सञ्जालका केन्द्रीय सदस्य रुपेश दासलगायतका व्यक्तित्वहरूको उपस्थिति रहेको थियो।
मन्त्री जयसवालले आफ्नो मन्तव्यमा मधेस प्रदेशमा असमानता, विकृति, जातीय विभेद, बालविवाह र छिट्टै हुने विवाह जस्ता समस्याहरू समाधान गर्न संघीय, प्रदेश र स्थानीय सरकार तथा नागरिक समाजबीच सहकार्य आवश्यक रहेको बताए । उनले बालिका सशक्तिकरणका लागि बालिका संरक्षण ऐन, नीति तथा बालिका कोष जस्ता कार्यक्रम पहिलोपटक मधेस प्रदेशले सञ्चालन गरेको उल्लेख गर्दै महिलामैत्री कार्यक्रमहरूमा विशेष प्राथमिकता दिइएको जानकारी दिए ।
साथै, यस वर्षको बजेटमा पर्याप्त स्रोत छुट्याइएको र सामूहिक विवाह कार्यक्रमलाई समेत नीति तथा कार्यक्रममा समावेश गरी दहेज प्रथा, बालविवाह र छिट्टै हुने विवाह न्यूनीकरणमा जोड दिएको बताए ।
दुई दिनसम्म चलेको कार्यक्रममा साइबर सुरक्षासम्बन्धी चेतना, यौन तथा प्रजनन स्वास्थ्य, बालविवाह र बालश्रम अन्त्यका उपाय, साथै आठ जिल्लाका समस्याहरू प्रदर्शन गरिएको थियो।
