वीरगंज । खानेपानी मन्त्री प्रदीप यादवलाई फोनमा धम्की दिएको आरोपमा पक्राउ परेकी किरण साहलाई पर्सा जिल्ला अदालतले धराैटी छाेडन आदेश दिएकाे छ ।
न्यायाधीश कमलकान्त जोशीको इजलाशले कलैया उपमहानगरपालिका–२६, सिस्वा महेशपुर स्थायी घर भएकी हाल वीरगंज १३ मुर्ली निवासी साहलाई ५ हजार धराैटीमा छाेडन आदेश दिएकाे पर्सा जिल्ला अदालतका सूचना अधिकारी रामनरेश महतोले जानकारी दिए ।
मन्त्री यादवका स्वकिय सचिव हरिन्द्र साहकाे जाहेरी दरखास्तकाे आधारमा टिकटकर समेत रहेकी साहलाई गत शनिबार प्रहरीले नियन्त्रणमा लिएर अनुसन्धान थालेकाे थियाे । जिल्ला प्रहरी कार्यालय पर्साले विधुतिय काराेबार सम्बन्धि कसुर लगायतकाे मुद्दाकाे फाइल सरकारी वकिल कार्यालयम बुझाएपछि बिहिबार पर्सा जिल्ला अदालतमा थुनछेक बहस भएको थियाे ।
पक्राउ परेकी किरणकाे तर्फबाट अधिवक्ताहरु विनोद कुमार मल्लिक, राकेश मल्लिक र अजय स्वर्णकारले बहस गरेका थिए । किरणसंगै राैतहटका पत्रकार अभिमन्नु पटेल भन्ने अभिमनु राउतमाथी पनि सरकारी वकिलको कार्यालयले अदालमा अभियोग पत्र दर्ता गरेको छ ।
किरणले वीरगंजमा फैलिएकाे हैजा संक्रमण विषयमा मन्त्री यदावसंग फाेनमा चक्राे अवाजमा बहस गरेकी थिइन । आक्राेशित देखिएका किरणले बहस कै क्रममा मन्त्री यादवलाई ज्यान मार्ने धम्की समेत दिएकाे अडियाे समाजिक संजालमा भाइरल भएकाे थियाे ।
