वीरगंज । नेपाल रेडक्रस सोसाइटी रेशमकोठी उपशाखाले बिहिबार ६३औं स्थापना दिवस विशेष कार्यक्रमका साथ सम्पन्न गरेको छ।
कार्यक्रममा संस्थापक जा. हेनरी ड्युनाको तस्वीरमा माला र टीका अर्पण गरिएको थियो । सो अवसरमा उप–सभापति सरिता यादवको अध्यक्षता तथा नेपाल रेडक्रस सोसाइटी पर्सा शाखाका अध्यक्ष बृजकिशोर पटेलको प्रमुख आतिथ्यमा कार्यक्रम सम्पन्न भएको हो।
कार्यक्रममा उपशाखाका सचिव लाल बाबू सिंह, स–कोषाध्यक्ष अभिलाष कुमार गुप्ता, वरिष्ठ सल्लाहकार प्रकाश उपाध्याय, श्रवणबहादुर रायमाझी, सुरेन्द्र प्रसाद कानु, राम सुदिशलाल कर्ण, ध्रुव सिंह ठकुरी, श्रीनारायण यादव, भागवत प्रसाद चौधरीलगायतको उपस्थिति थियो।
नेपाल रेडक्रस सोसाइटी (नेरेसो) २०२० साल भदौ १९ गते स्थापना भएको हो । यो संस्था रेडक्रस तथा रेडक्रिसेन्ट सोसाइटीहरूको अन्तर्राष्ट्रिय महासङ्घ र रेडक्रसको अन्तर्राष्ट्रिय समितिमा आवद्ध भइसकेको छ । स्थापना कालदेखि नै मानवीय सेवामा सक्रिय रहँदै आएको यस संस्थाले यस वर्ष स्थापना दिवसलाई “मानवताको पक्षमा (On the side of humanity)” भन्ने नाराका साथ मनाइरहेको छ।
हाल नेपाल रेडक्रसमा करिब ११ लाखभन्दा बढी स्वयंसेवक क्रियाशील छन् । यसको संगठनात्मक संरचनामा ७ प्रदेश समिति, ७७ जिल्ला शाखा, १,६२३ उपशाखा, ११५ सहयोग समिति र ६,५८७ जुनियर तथा युवा सर्कल रहेका छन्।
