वीरगंज । जनता समाजवादी पार्टी (जसपा) नेपालले संघीय सरकारले ल्याएको भूमि अध्यादेशको विरोधमा बुधबार वीरगंजमा विरोध प्रदर्शन गरेको छ।
जसपा लिल्ला समन्वय समिति पर्साको आयोजनामा जिल्ला प्रहरी कार्यालय पर्सा अगाडिको लालाबंगलाबाट सुरु भएको विरोध र्याली घण्टाघर, माइस्थान, महाविरस्थान, आदर्शनगर हुँदै नाराबाजीसहित नगर परिक्रमा गर्दै पुनः घण्टाघरमा पुगेर कोणसभामा परिणत भएको थियो ।
र्यालीमा सहभागीहरूले “भूमि अधिकारमाथि हस्तक्षेप बन्द गर”, “जनताको अधिकार खोस्न पाइँदैन”, “संविधानविपरीतको अध्यादेश खारेज गर” जस्ता नाराहरू लगाएका थिए । र्यालीमा स्थानीय कार्यकर्ता, अगुवा नेता तथा सर्वसाधारणको उल्लेख्य सहभागिता रहेको थियो।
घण्टाघरमा आयोजित कोणसभालाई सम्बोधन गर्दै जसपा नेपालका केन्द्रीय सदस्य एवं पूर्व मन्त्री सिंगासन साहले भूमि अध्यादेश पारित भए मधेश मरुभूमि बन्ने दाबी गर्दै मधेशका सबै राजनीतिक दलहरूले यसको विरोध गर्नुपर्ने बताए ।
त्यस्तै, अर्का केन्द्रीय सदस्य शशि कपुर मियाले भूमि अध्यादेशमार्फत सत्ताधारीहरूले आफ्नो स्वार्थ पूर्ति गर्ने प्रयास गरेको आरोप लगाउँदै यसलाई “राष्ट्रघाती” संज्ञा दिए । उनले उक्त अध्यादेश केपी ओलीलाई बचाउन ल्याइएको दाबी गर्दै, “२६ विघा जग्गा कब्जा गरेका ओलीलाई जोगाउन अध्यादेश ल्याइँदैछ,” भने।
जिल्ला अध्यक्ष रामनरेश यादवले अध्यादेशलाई पूर्ण रूपमा जनविरोधी बताउँदै यसले गरिब, सीमान्तकृत र भूमिहीन वर्गको अधिकारमाथि प्रहार गर्ने आरोप लगाए । उनले अध्यादेश फिर्ता नभए आन्दोलनलाई देशव्यापी बनाउने चेतावनी पनि दिए ।
अन्य वक्ताहरूले संविधानले दिएको भूमि अधिकारको संरक्षण गर्नुपर्ने र जबरजस्ती गरिएको कुनै पनि निर्णय स्वीकार्य नहुने बताएका थिए । जसपाले आगामी दिनहरूमा भूमि अधिकारसम्बन्धी जनचेतना अभिवृद्धि गर्ने तथा थप दबाबमूलक कार्यक्रम सञ्चालन गर्ने घोषणा गरेको छ ।
विरोध कार्यक्रममा पूर्व मन्त्री करिमा बेगम, जसपा नेपालका केन्द्रीय सदस्य फिरोज मन्सुर, धाेबिनी गाउँपालिकाका अध्यक्ष मदन चाैहान, वडाध्यक्षहरु अजय चौरसिया, आतुषोष चतुरबेदी, बिरेन्द्र यादव, रितेश गुप्ता, महिला नेतृ रेखा साहलगायतले आ–आफ्नो धारणा राखेका थिए ।
