बारा । हालै बारा जिल्लाको प्रमुख जिल्ला अधिकारी (सीडीओ) का रूपमा जिम्मेवारी सम्हालेका प्रकाश पौडेलले जिल्लामा शान्ति–सुरक्षा कायम गर्दै सुशासन प्रवर्द्धन गर्न आफू दृढप्रतिज्ञ रहेको बताएका छन्।
मंगलबार जिल्ला प्रशासन कार्यालयको सभाहलमा आयोजित बाराका सक्रिय पत्रकारहरूसँगको परिचयात्मक कार्यक्रममा बोल्दै उनले सरकारका नीति तथा कार्यक्रमलाई प्रभावकारी रूपमा कार्यान्वयन गर्ने, कार्यालयमा हुने ढिलासुस्ती अन्त्य गरी पारदर्शिता कायम गर्ने र नागरिकता तथा राष्ट्रिय परिचयपत्र वितरणलाई सहज बनाउने प्रतिवद्धता जनाए ।
उनले जनशक्तिको अभाव रहे पनि सेवाग्राहीलाई सेवा प्रवाहमा कमी नआउने बताउँदै लागूऔषध ओसारपसार तथा सेवनलाई शून्य सहनशीलतासहित नियन्त्रण गर्ने योजनाबारे पनि जानकारी दिए।
कार्यक्रममा नेपाल पत्रकार महासंघ, बाराका अध्यक्ष रमेश सुवेदीले पछिल्लो समय पत्रकारहरू समाचार लेखनका कारण राज्य र गैर–राज्य पक्षबाट धम्की र दबाब झेल्नु परेको भन्दै पत्रकारहरूको सुरक्षा र प्रेस स्वतन्त्रताको सम्मान गर्न सीडीओ पौडेलको ध्यानाकर्षण गराए।
परिचयात्मक कार्यक्रममा सहायक प्रमुख जिल्ला अधिकारी छविरमण भट्टराई, राष्ट्रिय अनुसन्धान विभागका एसपी सरोज निरौला, पत्रकार महासंघ मधेश प्रदेशका कोषाध्यक्ष अनिल गौरव, कार्यसमिति उप–सचिव दुष्यन्त चौधरी, जिउत यादव, नरेश गुप्ता लगायतका करिब तीन दर्जन पत्रकारहरूको उपस्थिति थियो।
