वीरगंज । वीरगंज भन्सार कार्यालयमा कार्यरत अधिकांश कर्मचारीहरूको दर्जा र शाखा स्पष्ट नभएको पाइएको छ । कार्यालयको वेबसाइटमा सहसचिव, उपसचिव र अधिकृत तहका कर्मचारीहरूको विवरण मात्रै खुलाइएको छ भने दर्जा र शाखा उल्लेख नगरी ५० भन्दा बढी कर्मचारी लामो समयदेखि कार्यरत रहेको तथ्य बाहिर आएको हो।
भन्सार कार्यालयका प्रमुख विष्णुप्रसाद ज्ञवालीका अनुसार कार्यालयमा एकजना सहसचिव, तीनजना उपसचिव, २० जना अधिकृत र नायब सुब्बासहित ३० जना सुब्बाको दरबन्दी छ । तर वेबसाइटमा सहसचिवदेखि अधिकृतस्तरका कर्मचारी मात्र नामसहित प्रकाशित गरिएको छ भने सुब्बा र अन्य कर्मचारीहरूको नाम, दर्जा र शाखा सार्वजनिक गरिएको छैन।
स्रोतका अनुसार कार्यालयमा विनादर्जा कर्मचारी चालक, सहयोगी र करारकर्मीका रूपमा कार्यरत छन् । तर उनीहरूको संख्या अस्वाभाविक रूपमा बढेको छ । कार्यालयमा एक सयभन्दा कम दरबन्दी हुँदाहुँदै पनि ५० भन्दा बढी विनादर्जा कर्मचारी कार्यरत रहेको तथ्याङ्कमा देखिन्छ।
भन्सारका कर्मचारीहरूले नातागोता र निकटस्थलाई करार तथा दैनिक ज्यालादारीमा नियुक्त गर्ने गरेको, अधिकृतस्तरका कर्मचारीहरूले सरुवा भएर आएलगत्तै आफ्ना अनुकूलका कर्मचारी भर्ना गर्ने गरेको आरोप समेत लागेको छ । एक अधिकारीका अनुसार, केही अधिकृतहरूले चालक मात्र होइन, एकै कार्यकक्षमा तीनजना सहयोगीसम्म राख्ने गरेका छन्।
भन्सारमा बढी आम्दानी हुने भएकाले गोपनीयतालाई बहाना बनाएर दर्जा र शाखा नखुलाउने गरिएको र यो प्रक्रियामा राजनीतिक पहुँचसहितका व्यक्तिहरूको चासो हुने गरेको स्रोतको दाबी छ।
