वीरगंज । वीरगंज हालसालै हैजाको जोखिम बढ्दै गएपछि नेपाल रेडक्रस सोसाइटी वीरगंज उपशाखाले वडा नं. १५ का बासिन्दालाई निःशुल्क किट वितरण गरेको छ।
वितरण गरिएको किटमा जीवन जल (ORS), साबुन, पीयूष लिक्विड र पानी शुद्ध गर्ने ट्याबलेटसहितका सामग्रीहरू रहेका छन्, जसले हैजाको रोकथाम र उपचार दुवैमा सहयोग गर्ने जनाइएको छ।
कार्यक्रमका प्रमुख उमेश मिश्रले किट वितरणसँगै स्थानीयलाई हैजाबारे सचेतना फैलाउने अभियान सञ्चालन गरिएको जानकारी दिए । स्वास्थ्यकर्मी र स्वयंसेवकहरूले सरसफाइमा ध्यान दिनुपर्ने, हात धुने तरिका, उमालेको पानी पिउनुपर्ने तथा खानपानमा सावधानी अपनाउनुपर्ने विषयमा व्यावहारिक प्रशिक्षण दिएका थिए ।
रेडक्रस रेशमकोठी उपशाखाका स-कोषाध्यक्ष अभिलाष कुमार गुप्ताले स्वच्छ पानी र सरसफाइ नै हैजा नियन्त्रणको प्रमुख उपाय भएको बताउँदै, वितरण गरिएका सामग्रीहरूले परिवारलाई प्राथमिक स्तरमै सुरक्षित राख्न मद्दत गर्ने विश्वास व्यक्त गरे।
वडा नं. १५ का स्थानीय विकास साहले हैजाको डरले त्रसित रहेका बेला रेडक्रसले आवश्यक सामग्री र जानकारी दिएपछि समुदाय केही हदसम्म ढुक्क भएको बताए।
यसैबीच, स्वास्थ्य कार्यालय पर्साले वीरगंजका विभिन्न बस्तीमा हैजासँग मिल्दोजुल्दो लक्षण देखिएको भन्दै सतर्क रहन आह्वान गरेको छ। चिकित्सकहरूले दूषित पानी नपिउनु, खुला स्थानमा दिसा नगर्नु र साबुनपानीले नियमित हात धुनु हैजा नियन्त्रणको प्रमुख उपाय भएको बताएका छन्।
कार्यक्रम संयोजक दयाशकर सिंहका अनुसार हैजा प्रभावित वा जोखिमयुक्त वडा नं. १४, १५ र १६ मा यस्ता अभियान विस्तार गर्ने तयारी भइरहेको छ। आजको कार्यक्रममा गुडी कुमारी साहको नेतृत्वमा प्रमोद प्रसाद यादव, अभिलाष गुप्ता, विकास कुमार साह, राजेन्द्र ठाकुर, श्याम महतो, राजु साहलगायत स्वयंसेवकहरूको सक्रिय सहभागिता थियो।
