सर्लाही । हालै मन्त्रिपरिषद्ले देशभरका २३ जिल्लामा नयाँ इलाका प्रशासन कार्यालय स्थापना गर्ने निर्णयसँगै बलरा नगरपालिकामा पनि कार्यालय स्थापना गर्ने निर्णय भएको छ । तर, उक्त निर्णयलाई लिएर गोडैता नगरपालिकाका जनप्रतिनिधि र स्थानीयहरूले गृहमन्त्रीलाई ध्यानाकर्षण पत्र बुझाउँदै कार्यालय बलराको सट्टा गोडैतामा स्थापना गर्नुपर्ने माग गरेपछि बलरा नगरपालिकाले गम्भीर आपत्ति जनाएको छ ।
बलरा नगरपालिकाका मेयर रामाशंकर कुशवाहाले विज्ञप्ति जारी गर्दै इलाका प्रशासन कार्यालय बलरामै स्थापना हुनुपर्नेमा जोड दिएका छन् । उनले सीमा सुरक्षाको संवेदनशीलता, स्थानीय तहलाई सहज हुने पहुँच, शैक्षिक, स्वास्थ्य तथा वित्तीय संस्थाको उपस्थिति र भौगोलिक उपयुक्तता बलरामै रहेको तर्क गरे ।
‘बलराको सट्टा गोडैतामा कार्यालय स्थापना गर्ने विकल्पमा छलफल नै नगरी अघि बढाउनु अन्यायपूर्ण कदम हो,’ मेयर कुशवाहाले भने, ‘बलरामा विद्यालयदेखि अस्पताल, बैंक, प्रहरी चौकीलगायत संरचना व्यवस्थित छन् । सुरक्षा नपुगेको स्थानलाई सुरक्षित बनाउनु नेतृत्वको दायित्व हो, कार्यालय स्थानान्तरण गर्ने होइन ।’
उनले बलरा नगरपालिका, रामनगर, धनकौल, गोडैता र विष्णु गाउँपालिकाका जनतालाई पायक पर्ने गरी बलरा नगरपालिका भित्रकै उपयुक्त स्थानमा कार्यालय स्थापना गर्नुपर्ने आवश्यकता औंल्याए ।
बलरावासीलाई सदियौँदेखि विभेद गरिएको भन्दै मेयर कुशवाहाले इलाका प्रशासन कार्यालय बलरामै राख्ने सरकारको निर्णयप्रति आभार प्रकट गर्दै यसलाई परिणाममुखी बनाउन सम्पूर्ण सरोकारवालाहरूको सुझाव, साथ र सहयोगको अपेक्षा राखेका छन् ।
