वीरगंज । संघीय सरकारका खानेपानी मन्त्री प्रदीप यादवलाई फोनमा धम्की दिएको आरोपमा टिकटकर किरण साह पक्राउ परेकी छन् । कलैया उपमहानगरपालिका–२६, सिस्वा महेशपुर स्थायी घर भएकी हाल वीरगंज १३ मुर्ली बस्दै आएकी साहलाई शनिबार प्रहरीले नियन्त्रणमा लिएको हो ।
जिल्ला प्रहरी कार्यालय पर्साले आइतबार साहविरुद्ध साइबर तथा विद्युतीय अपराध, संघिय सांसदलाई धम्की दिन नहुने र झुठा कुराकाे अफवाह फैलाएकाे कसुरमा अनुसन्धान अगाडि बढाइएको जिल्ला प्रहरी कार्यालय पर्साका प्रवक्ता प्रहरी नायब उपरिक्षक किशाेर लम्सालले जानकारी दिए ।
पक्राउ परेकी साहलाई पर्सा जिल्ला अदालतबाट ३ दिन म्याद अनुमति लिई थप अनुसन्धान भइरहेकाे प्रवक्ता लम्सालले वताए । साहले वीरगंजमा फैलिएकाे हैजा संक्रमणकाे विषयमा मन्त्री यादवसंग फाेनमा चर्काे कुरा गरेकी थिइन । मन्त्री यादव र साह बिच फाेनमा भएकाे संवादकाे अडियाे अहिले समाजिक संजालमा भाइरल भइरहेकाे छ ।
एक पक्षले साहले मन्त्री यादवसंग गरेकी चक्राे स्वरमा कुरालाई आलाेचना गरिरहेका छन् भने अर्काे पक्षले उनकाे परिवारका सदस्यहरु बिरामी भई अस्पतालमा भर्ना रहेकाले उनले आक्राेश पाेखेकी बताइरहेका छन् ।
