वीरगंज । बीबीसी नेपाली सेवाकी संवाददाता तथा मधेस खबर अनलाइन न्युज पोर्टलकी सम्पादक माधुरी महतो पूर्वराष्ट्रपति विद्यादेवी भण्डारीबाट सम्मानित भएकी छन्।
शनिबार वीरगंज उद्योग वाणिज्य संघले आयोजना गरेको ‘वृहत महिला सम्मेलन २०८२’ मा पूर्वराष्ट्रपति भण्डारीले महतोलाई दोसल्ला ओढाएर र कदरपत्र प्रदान गरी सम्मान गरेकी हुन्।
“नारी शक्ति, समर्पण र सम्मान” भन्ने नारासहित आयोजित सम्मेलनमा पर्सा र बारा जिल्लाका विभिन्न क्षेत्रमा लामो समयदेखि समाजका लागि महत्वपूर्ण योगदान पुर्याउँदै आएका २५ जना महिलाहरूलाई समेत दोसल्ला ओढाई कदरपत्रसहित सम्मान गरिएको थियो।
त्यस अवसरमा पूर्वराष्ट्रपति भण्डारीले उद्योग, शिक्षा, स्वास्थ्य लगायतका क्षेत्रमा क्रियाशील महिला शक्ति केवल परिवारको हिस्सा मात्र नभई समाजको प्रगतिका आधारस्तम्भ भएको उल्लेख गर्दै त्यस्ता महिलाहरूलाई खोजी गरी सम्मान गरेकोमा वीरगंज उद्योग वाणिज्य संघलाई धन्यवाद दिइन् ।
