वीरगंज । नारायणी रंगशालाको खेलमैदान सरसफाईदेखि मर्मत सम्भारमा यहाँका स्थानीय खेलाडीहरू आफैं खटिएका छन् । बजेट अभावका कारण जिर्ण बनेको रंगशाला पुनर्निर्माणमा सरकार उदासीन देखिएको भन्दै खेलाडीहरूले अभ्यास गर्न सक्ने वातावरण बनाउन मैदानको सरसफाई र मर्मत सुरु गरेका हुन् ।
आरम्भ भेट्रान क्लबका सचिव सन्तोष खड्काका अनुसार बिहानको समयमा स्थानीय खेलाडीहरू र १३ नम्बर गणका सशस्त्र प्रहरी जवानहरू सरसफाई र मर्मतमा सक्रिय छन् । उनले रंगशाला पूर्ण रूपमा जिर्ण भएपछि खेलकुद प्रतियोगिता समेत रोकिएको अवस्था रहेकाले अब सरसफाई गरेर भए पनि अभ्यास सम्भव हुने बताए ।
खेलाडी सुनिल राउतले पनि जिर्ण रंगशालाका कारण अभ्यासमा समस्या भएको भन्दै चिन्ता व्यक्त गरे । उनले काठमाडौंको दशरथ रंगशालापछि दोस्रो ठूलो मानिने नारायणी रंगशालाको स्तरोन्नति गर्न मन्त्रीहरूले पटक–पटक आश्वासन दिए पनि कार्यान्वयन नगरेकोप्रति दुःख व्यक्त गरे ।
प्रेक्टिसका लागि रंगशाला पुगेका अशेश्वर पटेलसहित दर्जनौं खेलाडीहरूले शनिबार कुदालो चलाएर मैदान मर्मत गरेका थिए । साथै, सशस्त्र प्रहरीले पनि बिहानको समयमा रंगशाला मर्मत र सरसफाईमा निरन्तर सहयोग गर्दै आएको खेलाडीहरूले जानकारी दिए ।
