सर्लाही । बलरा नगरपालिकाका मेयर रामाशंकर कुशवाहाले शनिबार नेकपा (माओवादी केन्द्र)का अध्यक्ष एवम् पूर्व प्रधानमन्त्री पुष्पकमल दाहाल ‘प्रचण्ड’सँग भेटघाट गरेका छन् ।
मेयर कुशवाहाले प्रचण्डसँगको सौहार्दपूर्ण भेटले राजनीतिक चेतना र नयाँ ऊर्जा प्राप्त भएको बताएका छन् । उनले देशको वर्तमान अवस्था, राजनीतिक परिवेश र भावी दिशाबारे भएको संवादलाई निकै प्रेरणादायी भन्दै प्रचण्डको देशप्रेम, मधेसप्रतिको आत्मीय भावना र समावेशीकरणप्रतिको दृढ विश्वास अनुकरणीय भएको उल्लेख गरे ।
“कोमल हृदय, गहिरो विचार र दूरदर्शी सोचले उहाँलाई युगपुरुषको स्थानमा स्थापित गरेको छ,” मेयर कुशवाहाले भने । उनले प्रचण्डको नेतृत्वमा पार्टी कार्यकर्तामा उत्साह, जनतामा विश्वास र अन्तर्राष्ट्रिय क्षेत्रमा सन्तुलन कायम हुने विश्वास व्यक्त गरे ।
यसै अवसरमा, बलरा निवासी चर्चित युवा नेता अनिल कुमार सिंह नेकपा (माओवादी केन्द्र)मा प्रवेश गरेका छन् । सिंहलाई पार्टी प्रवेशको अवसरमा मेयर कुशवाहाले हार्दिक बधाई तथा शुभकामना दिएका छन् ।
कार्यक्रमलाई ऐतिहासिक र अविस्मरणीय क्षणको रूपमा वर्णन गर्दै मेयर कुशवाहाले युवा विचार र जीवन्त प्रेरणाले मधेस र मुलुकलाई नयाँ उचाइमा पु-याउने विश्वास व्यक्त गरेका छन् ।
