वीरगंज । निमित्तकाे भरमा संचालन हुँदै आएका पर्साका पाँच स्थानीय तहमा संघीय मामिला तथा सामान्य प्रशासन मन्त्रालयले दरबन्दी अनुसारका प्रमुख प्रशासकीय अधिकृत पठाएको छ ।
बिहीबार गरिएको सरुवापछि अब पोखरिया नगरपालिका, बहुदरमाई नगरपालिका, ठोरी गाउँपालिका, छिपहरमाई गाउँपालिका र धोबिनी गाउँपालिकामा निमित्तको भरमा चल्दै आएको अवस्था अन्त्य भएको छ ।
मन्त्रालयको सरुवा नामावली अनुसार पोखरियामा उपसचिव प्रदर्शनी कुमारी, बहुदरमाईमा उपसचिव सागर साह, ठोरीमा शाखा अधिकृत सरोज चौधरी, छिपहरमाईमा मो. महफुज अहमद र धोबिनीमा कृष्ण खतिवडाले प्रमुख प्रशासकीय अधिकृतको जिम्मेवारी सम्हाल्ने भएका छन् ।
यसअघि यी पालिकामा रामविनय सिंह, बृजकिशोर प्रसाद, अशोक रौनियार, कदिर बाबु देवान, धर्मराज थापा र बिन्दवासिनी गाउँपालिकामा श्याम बाबु साह कानु निमित्त प्रमुख प्रशासकीय अधिकृतको रूपमा कार्यरत थिए।
बिन्दवासिनीमा भने मन्त्रालयले यसअघि नै शाखा अधिकृत महमद प्रवेज आलमलाई पठाइसकेको छ । अब पर्सा जिल्लामा केवल वीरगंज महानगरपालिकामात्र निमित्त प्रमुख प्रशासकीय अधिकृतको भरमा सञ्चालन हुने अवस्था बाँकी रहेको छ, जहाँ अरबिन्द लाल कर्ण कार्यरत छन्।
संघिय मामिला तथा सामान्य प्रशासन मन्त्री भागवती न्याैपानेका अनुसार अर्काे चरणमा वीरगंज महानगरपालिकाकाे निमित्तकाे ठाउँमा दरबन्दी अनुसारकाे प्रमुख प्रशासकीय अधिकृत पठाइने छ ।
