काठमाडौं । संघीय मामिला तथा सामान्य प्रशासन मन्त्री भागवती न्यौपानेले शुक्रबारदेखि देशभरका गाउँ र नगरपालिकामा ‘निमित्त प्रणाली’ अन्त्य भएको घोषणा गरेकी छन् । अबदेखि पालिकाहरू दरबन्दी अनुसारको प्रमुख प्रशासकीय अधिकृत (प्रशासक) को नेतृत्वमा सञ्चालन हुनेछन् ।
मन्त्री न्यौपानेका अनुसार, उनी कार्यभार सम्हाल्दा ७५३ पालिकामध्ये २०० भन्दा बढी पालिका निमित्त कार्यलय प्रमुखको भरमा चलिरहेका थिए । मन्त्रालयले बिहिबार निमित्त हाकिम भएको ठाउँमा दरबन्दी अनुसारको प्रमुख प्रशासकीय अधिकृत पठाएको छ ।
“सुशासनको मुख्य औजार कर्मचारी प्रशासन हो । यसलाई निरन्तर सुधार र परिमार्जन गर्दै अघि बढ्नुपर्छ भन्ने सोचका साथ यो निर्णय गरिएको हो,” उनले भनिन् ।
उनले प्रमुख प्रशासकीय अधिकृतको जिम्मेवारी पाएका कर्मचारीलाई दक्षता र इमान्दारीसहित काम गर्न आग्रह गर्दै पालिका प्रमुख तथा जनप्रतिनिधिहरूलाई पनि स्वागतपूर्वक उनीहरूको क्षमताको सदुपयोग गर्न आह्वान गरिन् ।
मन्त्री न्यौपानेले अबको अर्को चरणमा उपमहानगरपालिका र महानगरपालिकामा पनि निमित्त प्रणाली अन्त्य गरिने जानकारी दिइन् ।
उनले थपिन्, “आम जनताको हितलाई केन्द्रमा राखेर गरिएको यस निर्णयलाई सफल बनाउन सबैको साथ, सहयोग र सुझावको अपेक्षा गर्दछु ।”
