वीरगंज । नेशनल मेडिकल कलेज प्रा. लि. र शिवम फार्मास्युटिकल्स लिमिटेडबीच स्वास्थ्य सेवा सम्बन्धी एक महत्वपूर्ण आपसी सम्झौता सम्पन्न भएको छ । वीरगंज–१५, पर्सास्थित नेशनल मेडिकल कलेजको दर्ता कार्यालयमा आयोजित विशेष कार्यक्रममा दुवै पक्षका प्रतिनिधिहरूको उपस्थितिमा सम्झौतापत्रमा हस्ताक्षर गरिएको हो।
सम्झौताअनुसार शिवम फार्मास्युटिकल्सका सञ्चालक समिति सदस्य, कर्मचारी तथा प्रत्यक्ष आश्रितहरूलाई नेशनल मेडिकल कलेज तथा शिक्षण अस्पतालबाट विशेष छुट र सुविधा सहितको स्वास्थ्य सेवा उपलब्ध गराइनेछ । सामाजिक सुरक्षा कोषमा आबद्ध लाभार्थीहरूले ८० प्रतिशत खर्च कोषबाट व्यहोर्ने र बाँकी २० प्रतिशत रकम एक महिनाभित्र GOP सुविधामार्फत भुक्तानी गर्नुपर्ने व्यवस्था मिलाइएको छ। सामाजिक सुरक्षा कोषमा नजोडिएका लाभार्थीहरूलाई उपचार सेवामा २० प्रतिशत र औषधिमा ५ प्रतिशत छुट प्रदान गरिनेछ।
शिवम फार्मास्युटिकल्सका कर्मचारीहरूको उपचार खर्चमा दुई लाखदेखि पाँच लाख रुपैयाँसम्म ३० दिनको GOP सुविधा, पाँच लाखभन्दा माथि खर्च भएमा ४५ दिनको GOP सुविधा उपलब्ध हुनेछ। पूर्व–रोजगार तथा वार्षिक स्वास्थ्य परीक्षणसहित अन्य स्वास्थ्य सेवा आपसी समझदारीमा भुक्तानीयोग्य हुनेछन्। साथै, शिवम फार्मास्युटिकल्सको परिसरमा प्रत्येक तीन महिनामा निःशुल्क स्वास्थ्य शिविर सञ्चालन गरिने सम्झौता भएको छ।
संयुक्त ब्राण्ड प्रयोग गर्ने, शिवम फार्मास्युटिकल्सका कार्यक्रमहरूमा नेशनल मेडिकल कलेजलाई चिकित्सकीय साझेदारका रूपमा समावेश गर्ने तथा सेवाको सहज सञ्चालनका लागि दुवै संस्थाबाट सम्पर्क व्यक्ति तोक्ने व्यवस्था पनि सम्झौतामा समावेश गरिएको छ।
सम्झौतापत्रमा नेशनल मेडिकल कलेज तथा शिक्षण अस्पताल निर्देशक डा. इशरत जहाँ अन्सारीले हस्ताक्षर गर्नुभएको थियो। सो अवसरमा ईन्जिनियर प्रदीप चौधरी, मार्केटिङ प्रबन्धक जितेश चन्द्र दास, प्रशासन अधिकृत विश्वनाथ कान्त, प्रशासन अधिकृत पप्पु सिंह र प्रेस सल्लाहकार आशिक अन्सारीको उपस्थिति रहेको थियो।
शिवम फार्मास्युटिकल्सतर्फबाट प्रशासन अधिकृत सञ्जय चौधरीले हस्ताक्षर गर्नुभएको थियो भने उत्पादन विभाग प्रमुख निरज प्रसाद चौधरी र गुणस्तर नियन्त्रण प्रमुख प्रविन चौधरी पनि उपस्थित रहेका थिए।
सम्झौताले अस्पताल र औद्योगिक क्षेत्रबीचको सहकार्यलाई नयाँ उचाइमा पुर्याउने विश्वास लिइएको छ। स्वास्थ्य सुरक्षालाई प्राथमिकतामा राख्दै गरिएको यस सहकार्यले संस्थागत सामाजिक उत्तरदायित्व, पारदर्शिता र दीर्घकालीन सम्बन्ध सुदृढ पार्ने अपेक्षा गरिएको छ।
