वीरगंज । नेपाल राष्ट्र बैंक कर्मचारी संघ वीरगंज समितिद्वारा तीज पर्वको अवसरमा आयोजित विभिन्न प्रतियोगिताहरू उत्साहपूर्वक सम्पन्न भएका छन् । यहीँ भदौ ४ गतेदेखि ७ गतेसम्म सञ्चालन भएको कार्यक्रममा वीरगंजस्थित २२ वटा बैंक तथा वित्तीय संस्थाका महिला कर्मचारीहरूको सहभागिता रहेको थियो।
कार्यक्रमअन्तर्गत ब्याडमिन्टन, स्लो स्कुटर रेस, टग अफ वार, लेडिज गट ट्यालेन्ट, बेस्ट रील्स कम्पिटिसन र बेस्ट फाइनान्सियल रील्स कम्पिटिसन गरी ६ वटा प्रतियोगिताहरू आयोजना गरिएको थियो । प्रतियोगितामा सहभागी महिला कर्मचारीहरूले आफ्नो प्रतिभा, सिप र आत्मविश्वास प्रस्तुत गरेका थिए।
ब्याडमिन्टन खेलमा नेपाल एस.बी.आई. बैंककी रिया झा र नेहा महतो प्रथम भएका थिए भने नेपाल राष्ट्र बैंककी शिल्पा केशरी र निरञ्जु राम द्वितीय बने । स्लो स्कुटर रेसमा सिद्धार्थ बैंककी स्मिता साह प्रथम, नेपाल बैंक लिमिटेडकी अन्सु चौधरी द्वितीय र नबिल बैंककी अनसिका जोशी तृतीय भए ।
यस्तै, टग अफ वार प्रतियोगितामा लक्ष्मी सनराइज बैंकले प्रथम स्थान हासिल गरेको थियो भने प्रभु बैंक द्वितीय र एभरेष्ट बैंक तृतीय बने । लेडिज गट ट्यालेन्टमा नेपाल बैंककी रश्मी कानु विजयी भएकी थिइन् भने द्वितीय स्थान लक्ष्मी सनराइज बैंककी मनिषा कर्माचार्य र सुस्मिता भुसाललाई प्राप्त भयो । तृतीय स्थान नबिल बैंककी दृष्टि गुप्ताले हात पारिन् ।
त्यसैगरी, बेस्ट रील्स कम्पिटिसनमा प्रभु बैंककी प्रिया नेपाल प्रथम भइन् भने लक्ष्मी सनराइज बैंककी शिवानी कार्कीको समूह द्वितीय र प्राइम बैंककी मर्यादा थापा समूह तृतीय बने । बेस्ट फाइनान्सियल रील्स कम्पिटिसनमा एन.एम.बी. बैंककी हिना श्रीवास्तव, अपेक्षा ढकाल, दिशा अधिकारी, ज्योति झा र आयुषा श्रेष्ठको समूह प्रथम, लक्ष्मी सनराइज बैंककी नेहा कुमारी र सुस्मिता भुसालको समूह द्वितीय तथा महालक्ष्मी विकास बैंककी भूमिका दास तृतीय बने ।
प्रतियोगिताका विजेताहरुलाई प्रमाणपत्रसहित पुरस्कार वितरण गरिएको थियो । कार्यक्रम सफल बनाउन सहयोग गर्ने सबैलाई धन्यवाद दिंदै संयोजक नरेश कुमार सर्राफले आगामी वर्षहरूमा अझ व्यापक रूपमा तीज कार्यक्रम आयोजना गरिने बताए ।
