वीरगंज । वीरगंज महानगरपालिका अन्तर्गतकाे राजमार्गमा कर असुलीकाे नाममा ढाट ठेकेदारका कर्मचारीले बलजबरजस्ती अवैध असुली गर्दै आएकाेले कारवाहीकाे माग गर्दै महानगरपालिकामा उजरी परेकाे छ ।
वीरगंज महानगरपालिकाकाे वडा नं. २२ जगरनाथपुरस्थित ढाटमा नियमविपरित बलजबरजस्ती भइरहेकाे कर असुली राेक्न माग गर्दै स्थानिय अमर प्रसाद यादवले साेमबार वीरगंज महानगरपालिका लिखित निवेदन दर्ता गराएका छन् । उनले महानगरपालिकाकाे राजश्व शाखामा दिएको निवेदनमा भारतीय मालवाहक सवारीसाधनलाई कर तिर्नुपर्ने कारण नहुँदा पनि “भारतीय सवारी हो” भन्दै बाटो छेकी जबर्जस्ती रकम असुली गरिएको उल्लेख छ ।
निवेदनमा ठेकेदार कर्मचारीहरूले एउटै सवारीसाधनलाई पटक–पटक करको नाममा रकम असुलेर चालकसँग विवाद, झगडा र कुटाकुट हुने अवस्था सिर्जना गरेको, जसका कारण स्थानीयवासीलाई समेत तनावपूर्ण स्थिति सहनु परेको जनाइएको छ ।
यसरी हुने अनियमित असुलीबारे पत्रपत्रिकामा पटक–पटक समाचार आए पनि ठेकेदारले सुधार नगरेको भन्दै पीडित पक्षले तत्काल छानबिन गरी आवश्यक कारबाही गर्न महानगरपालिकालाई आग्रह गरेको छ ।
महानगरपालिकाले “जडिबुटी, कबाडी तथा जीवजन्तु कर” उठाउन अमित ठेक्का पट्टालाई ठेक्का दिएको छ । सम्झौताअनुसार ठेकदारले महानगर क्षेत्रभित्र उत्पादन संकलन तथा व्यवसायिक कारोबारमा मात्र कर लिन पाउने व्यवस्था छ ।
तर ठेकदार कम्पनीले नियम विपरीत सम्पूर्ण भारतीय मालवाहक सवारीसाधनबाट प्रतिगाडी ४ सयदेखि ५ सय रुपैयाँसम्म असुली गर्दै आएको स्थानीयले बताएका छन् । अमित ठेक्का पट्टाले नै वीरगंजसहित परवानीपुर र जितपुरसिमरामा पनि कवाडी करकाे ठेक्का लिएकाे छ ।
