काठमाडौँ । जनता समाजवादी पार्टी (जसपा)ले संघीय सरकारमा आफ्ना तर्फबाट रहेका दुई मन्त्रीलाई फिर्ता बोलाउने निर्णय गरेको छ।
पार्टीका एक पदाधिकारीका अनुसार खानेपानी मन्त्री प्रदीप यादव र महिला, बालबालिका तथा ज्येष्ठ नागरिक मन्त्री नवलकिशोर साह सुडीलाई फिर्ता बोलाएर नयाँ मन्त्री पठाउने तयारी गरिएको हो।
“सरकारमा सहभागी भएका मन्त्रीहरूलाई सुरुमै एक वर्षका लागि मात्रै हो भनिएको थियो। त्यसअनुसार उनीहरूलाई फिर्ता बोलाएर नयाँ मन्त्री पठाउने निर्णय पार्टीले गरेको छ,” पदाधिकारीले बताए।
अध्यक्ष अशोक राईले प्रधानमन्त्री केपी शर्मा ओलीलाई खानेपानी मन्त्रीका लागि वीरेन्द्र महतो र महिला, बालबालिका तथा ज्येष्ठ नागरिक मन्त्रीका लागि रञ्जु ठाकुरको नाम सिफारिस गरिसकेका छन्।
तर, मन्त्रिपरिषद पुनर्गठन कहिले हुने भन्ने टुंगो भने प्रधानमन्त्रीको निर्णयमा भर पर्नेको पदाधिकारीले जनाए।
जसपाका अनुसार शनिबार बसेको पदाधिकारी बैठकमा समेत मन्त्री फिर्ता बोलाउने र नयाँ मन्त्री पठाउने विषयमा छलफल भएको थियो।
